Qazaqstandyqtar tólqujatty bir kúnniń ishinde ala alady
ASTANA. QazAqparat - Elimizdiń 4 qalasynda tólqujatty bir kúnniń ishinde alýǵa jaǵdaı jasaldy. Bul jaıynda búgin Úkimettiń selektorlyq rejimdegi otyrysynda Premer-Mınıstr Baqytjan Saǵyntaev aıtty, dep habarlaıdy QazAqparat.
«Biz tólqujat berý jaıynda sóz qozǵadyq. Bizde tólqujat basyp shyǵaratyn sáıkesinshe kásiporyndar 4 qalada, atap aıtqanda Astana, Almaty, Aqtóbe, Shymkentte bar. Biraq, ókinishke oraı tipti bul qalalardyń ózinde tólqujat alý úshin úsh kún kútý qajet. Alaıda aqshaǵa bir kúnniń ishinde jasaýǵa múmkindik bar. Sondyqtan biz atalǵan kásiporyndar ornalasqan 4 qalada tólqujattardy bir kúnniń ishinde berý týraly sheshim qabyldadyq», - dedi Úkimet basshysy.
Sonymen qatar ol Astana, Almaty, Aqtóbe jáne Shymkent qalalaryndaǵy kásiporyndardan tólqujat jasatý merziminiń de aıtarlyqtaı qysqartylǵanyn basa aıtty.
«Osy qalalarǵa bekitilgen ózge qalalarda buǵan deıin tólqujat berý 2 aptaǵa sozylatyn bolsa, endigi ýaqytta qujat berý 1 aptanyń ishinde bitetin bolady», - dedi Saǵyntaev.
