Qazaqstandyqtar tisterin ózderi julatyn jaǵdaıǵa jetýi múmkin - depýtat
ASTANA. QazAqparat - Búgin Májilistiń jalpy otyrysynda depýtat Merýert Qazbekova stomatologııa salasynda alańdatatyn máseleler boıynsha Densaýlyq saqtaý mınıstri Eljan Birtanovqa saýalyn joldady, dep habarlaıdy QazAqparat.
«Aq jol» depýtattyq fraktsııasyna jeke medıtsınalyq mekemeler ózderi atqaryp otyrǵan stomatologııalyq qyzmetterdi qatańdatý máselesi boıynsha pikirlerin aıtyp jatyr. 2016 jylǵy 12 jeltoqsandaǵy Densaýlyq saqtaý jáne áleýmettik damý mınıstriniń buıryǵymen Qazaqstan Respýblıkasynda stomatologııalyq kómekti kórsetýdi uıymdastyrýdyń standarty bekitildi. Endi jańa standartqa sáıkes, stomatologııalyq em-domdy tek stomatolog mamandyǵy boıynsha joǵary bilimi bar dárigerler ǵana júzege asyra alady. Sonymen qatar, búginde jeke stomatologııalyq kabınetterde medıtsınalyq kolledjder men tehnıkýmdarda, ıaǵnı orta arnaýly bilimimen dantıst jáne tis dárigeri baǵytynda oqyǵandar basymdyqqa ıe»,-dep toqtaldy Qazbekova.
Depýtattyń sózine qaraǵanda, orta arnaýly bilimi bar stomatologtardyń kóbi 10-25 jyl aralyǵynda tájirıbe jınaqtap úlgergen, sondaı-aq olar búginde joǵary jáne birinshi dárigerlik sanaty bar tájirıbeli mamandar bolyp tabylady. Degenmen de mınıstrdiń joǵaryda atalǵan buıryǵymen kóp jyldardan beri tájirıbe jınaqtaǵan bilikti dárigerler óz betinshe stomatologııalyq qyzmetterdi kórsetý quqyǵynan aıyrylyp otyr.
«Sonymen birge osyǵan deıin qyzmet etip kelgen aýmaqtar tis dárigeriniń kómeginsiz qalady. Máselen, iri aýyldyq jerlerde 1-2 stomatologııalyq kabınet bar. Endi azamattar ortalyqtandyrylǵan klınıkalarǵa barýǵa májbúr bolady, osyǵan ózderiniń ýaqytyn jumsap, áýrege túsedi. Keıbireýleri ortalyqtan qashyq jerde turatyndyqtan nemese qarjynyń joqtyǵynan tisterin emdeýdiń ornyna, sanıtarlyq normalardy buza otyryp, aýyratyn tisterin ózderi julatyn jaǵdaıǵa barýy múmkin»,-dedi M. Qazbekova.
Osy oraıda ol mınıstrge atalǵan standartty qaıta qarap shyǵý ótinimin jasady.
