Qazaqstandyqtar temeki satyp alýǵa qansha aqsha jumsaıdy
NUR-SULTAN. QazAqparat – 2020 jyldyń 11 aıynda árbir qazaqstandyq temekige ortasha eseppen 34,8 myń teńge jumsady, dep habarlaıdy QazAqparat tilshisi energyprom.kz portalyna silteme jasap.
2020 jyldyń jeltoqsanynda fıltrli sıgaret baǵasy 1 jyl burynǵyǵa qaraǵanda 14,9 paıyzǵa qymbattady. Temeki baǵasynyń ósimi Atyraý (bir jylda 20,9 paıyz), Jambyl (20,3) jáne Almaty oblysynyń turǵyndaryna qatty sezildi. Elimizdiń qalalaryndaǵy bazarlar men dúkenderde bir qorap temeki baǵasy jeltoqsanda 508 teńgege jetti.
2020 jyldyń 11 aıynyń qorytyndysynda jergilikti kompanııalar ishki naryqtardy temeki jáne papırospen 75,2 paıyzǵa qamtamasyz etti. Al 2019 jyly bul kórsetkish nebári 30,9 paıyzdy quraǵan bolatyn.
Atalǵan kezeń ishinde óndiris kólemi 2,5 paıyzǵa tómendegenine qaramastan ımport birden 7 esege, 5 mlrd danaǵa deıin qysqardy. Eksport úlesi 2,7 mlrd sıgaret pen papırosty qurady. El turǵyndary 11 aıda 17,6 mlrd dana temeki shekti. Bul rette shylymqorlardyń úlesi bir jyl burynǵy kórsetkishke qaraǵanda birden 32,9 paıyzǵa azaıyp otyr.
2020 jyldyń qańtar-qarashasynda árbir eresek qazaqstandyq 1,5 myń dana sıgaret pen papıros nemese kúnine 4,4 dana temeki shekken.
Ulttyq statıstıka bıýrosynyń málimetterine sáıkes, 2020 jyldyń qańtar-qarashasy aralyǵynda sıgarettiń ortasha baǵasy qorabyna 477 teńge boldy. Bir qorapta 20 sıgaret bolǵan kezde 11 aıda árbir qazaqstandyq ortasha eseppen 73 qorap temeki satyp alyp, oǵan 34,8 myń teńge jumsaǵan.
