Qazaqstandyqtar telebaǵdarlamalardy kórýdiń ýaqytyn tańdaı alady
ASTANA. QazAqparat - Jańa «Ǵalamtor arqyly habar taratý» qyzmetin endi qazaqstandyqtar da paıdalana alady. Osy qyzmet aıasynda 24 qazaqstandyq arna bir saıt pen bir mobıldi nusqada toptastyryldy, dep habarlady Kazpravda.kz.
Ǵalamtor arqyly habar taratý ary qaraı damyǵanda Qazaqstanda kórermender súıikti habarlaryn ózderine qolaıly ýaqytta kóre alady. Bul týraly QR Baılanys jáne aqparat agenttiginiń tóraǵasy Asqar Jumaǵalıev málimdedi.
«Paıdalanýshylardyń qolaılyǵy úshin 24 arnany bir saıtqa, bir mobıldi nusqaǵa biriktirdik. Jaqyn arada «keıin kórý» fýnktsııasyn qospaqpyz. Sóıtip sizder súıikti baǵdarlamalaryńyzdy qalaǵan ýaqytta kóre alasyzdar. Osy fýnktsııanyń kómegimen arna efırin 24 saǵatqa artqa aınaldyrýǵa bolady», - dedi agenttik basshysy.
Aǵymdaǵy jyly 2 shildede Indýstrıalızatsııa kúni aıasynda jańa «Qazaqstan Respýblıkasynyń ǵalamtor arqyly ulttyq habar taratý» jáne «Telegazet» jobalary iske qosyldy. Olar otandyq sandyq tele-radıo habar taratýdy damytý memlekettik baǵdarlamasy, sondaı-aq «Qazteleradıo» AQ kórsetetin qyzmet aıasynyń keńeıýi sheńberinde daıyndaldy.
