Qazaqstandyqtar tańdaǵan kólikterdiń ondyǵy qandaı
NUR-SULTAN. QazAqparat – Qazaqstan avtobıznes qaýymdastyǵy qazaqstandyqtardyń shildede eń kóp tańdaǵan kólikterdiń ondyǵyn jarııalady, de habarlaıdy QazAqparat tilshisi.
«Osy jyldyń shilde aıynda elimizdegi avtokólik naryǵy senimdi túrde ósimin jalǵastyrdy. Buǵan eń aldymen dılerlerdiń úzdik brendterdi elge ákelýi sebep bolyp otyr. Shildede jańa avtokólikterdiń satylymy ótken jyldyń tıisti kezeńimen salystyrǵanda 11 paıyzǵa ósti. Qazaqstandyq dılerler ótken aıda 6 183 jeńil avtokólik jáne jeńil kommertsııalyq tehnıka, 854 dana aýyr júk kóligin, tehnıka men avtobýsty satyp úlgerdi. 2019 jyldyń 7 aıynyń qorytyndysy boıynsha otandyq naryq ótken jylmen salystyrǵanda 21 paıyzǵa – 39 115 satylǵan avtokólikke artty», - delingen qaýymdastyqtyń habarlamasynda.
Shildede satylǵan jeńil avtokólikterdiń kóshin Toyota (1 425 avtokólik, ótken aıdan qaraǵanda 16 paıyzǵa artyq) markasy bastap tur. Al jeti aıdyń ishinde atalmysh marka boıynsha 8 066 dana kólik (ótken jyldyń tıisti kezeńimen salystyrǵanda 19 paıyzǵa artyq) satylǵan. Ekinshi oryndy satylǵan 1 417 kóligimen Lada jalǵastyrdy. Jeti aıda Lada markaly 8 758 dana kólik satylǵan (+23%). Hyundai dılerleri de qarqynyn báseńdetpeı shildede 1 384 avtokólik (+2%) satyp úlgergen kórinedi. Al jyl basynan beri qazaqstandyqtar atalmysh markaly 7 394 (+81%) kólik satyp alǵan.
Odan keıingi oryndarǵa Ravon (325 kólik, +50%), Kia (245 kólik, +33%), Renault (244 kólik, (+12%), Nissan (192, -23%), Skoda (168, +121%), Lexus (139, +2% ) jáne Jac (126, +29%) markalary jaıǵasqan.
Al modelder boıynsha shilde aıynda eń kóp satylǵan kólikterdiń tizimi mynadaı: Toyota Camry – 622, Lada Granta - 433, Lada Vesta – 423, Hyundai Tucson – 411, Hyundai Elantra - 341, Lada 4x4 - 323), Ravon Nexia R3 - 315, Hyundai Creta – 266, Hyundai Accent – 259, Toyota Corolla - 240.
