Qazaqstandyqtar tamaqqa kóp qarjy jumsaıtyn boldy
ASTANA. QazAqparat - Qazaqstandyq otbasylar tamaqqa kóp qarjy jumsaıtyn bolǵan, jalpy tutyný shyǵynynyń 46%-y azyq-túlikke ketedi. Sondaı-aq, qazaqstandyq kedeıler tamaqty az tutynsa, baılar kersinshe kóp paıdalanatyn bolǵan, dep habarlaıdy QazAqparat www.ranking.kz saıtyna silteme jasap.
Agenttiktiń taratqan málimetterine qaraǵanda, Qazaqstandyq otbasylardyń tamaqqa jumsalatyn shyǵyny kún sanap artyp keledi. 2017 jylǵy I toqsan qorytyndysy boıynsha úı sharýashylyǵyndaǵy jalpy tutyný shyǵynynda azyq-túlikti satyp alýǵa jumsalǵan qarjynyń úlesi 45,9%-dy qurap, sońǵy 5 jyl ishinde eń joǵary mejege jetti. Aıta keteıik, bul kórsetkish ótken jyldyń qańtar-naýryz aılarynda 44,4% deńgeıinde bolǵan edi.
Qazaqstandyqtar et jáne et ónimderine kóp qarjy jumsaıdy eken. Máselen, 2016 jylǵy 1 toqsanynda tutynýshylyq bıýdjettiń 14,6%-y osyǵan ketse, bıyl onyń úlesi 15,3%-ǵa ósken.
Sonymen qatar, nan men jarma ónimderine - 7,4% qarajat jumsalatyny belgili boldy, bul kórsetkish ótken jyly 7,1%-ti quraǵan. Nan men jarmany tutyný bir jyldyń ishinde 0,7%-ke ósken.
Jalpy baǵnyń baǵanyń ósýi saldarynan kókónisterge de jumsalatyn qarajatty ulǵaıtqan. 2017 jylǵy І toqsany ishinde tutyný shyǵyny 3,4%-i ketken, bul ótken jyldyń dál osy kezeńinde 3,1%-i quraǵan.
Sonymen qatar, kókónisterdi tutyný birden 3,7%-ke túsip ketip, adam basyna 19,1 kelige jetken.
Qazaqstandyqtar balyq jáne teńiz ónimderin satyp alýǵa az qarjy jumsaıtyn bolǵan (ótken jyly 1,65%, bıyl 1,5%) - QR turǵyndary atalmysh ónimdi 4,6%-ke az paıdalanady.
Baǵanyń ósýi men naqty tabystyń qysqarýy saldarynan halyqtyń az qamtylǵan bóligi tamaq ishýdi shekteýge májbúr.
