Qazaqstandyqtar shomylýǵa bolatyn oryndardy mobıldi qosymsha arqyly bile alady

NUR-SULTAN. QazAqparat – Endigi ýaqytta qazaqstandyqtar shomylýǵa ruqsat berilgen nemese tyıym salynǵan sý aıdyndary týraly málimetti mobıldi qosymshanyń kómegimen anyqtaı alady. Bul týraly QR TJM Azamattyq qorǵanys jáne áskerı bólimder komıtetiniń tóraǵasy Baýyrjan Syzdyqov málim etti, dep habarlaıdy QazAqparat tilshisi.

«Eresekter men balalardyń sýdaǵy qaýipsizdigin qamtamasyz etýge baǵyttalǵan aqparattyq-profılaktıkalyq jumys úzdiksiz júrgizilip keledi. Jyl basynan beri BAQ-qa arnalǵan 135 brıfıng ótti. Radıo jáne teledıdarlarda bizdiń ókilder 4261 ret efırge shyqty. Sonymen qatar gazetter men jýrnaldarda 587 maqala jarııalandy. Sol sııaqty áleýmettik jeliler men messendjerlerde sýdaǵy qaýipsizdik erejeleri boıynsha 52 beınerolık ornalastyrylyp, kún saıyn kórsetilip jatyr», - dedi Baýyrjan Syzdyqov Ortalyq kommýnıkatsııalar qyzmeti alańynda ótken baspasóz máslıhatynda.

Sondaı-aq, komıtet basshysynyń málimdeýinshe, halyq arasynda 120 myńnan astam jadynama taratylyp, sý aıdyndarynda 2 myńnan astam qaýipsizdik belgileri ornatyldy.

«Azamattardyń sýdaǵy qaýipsizdigin qamtamasyz etý jáne tótenshe jaǵdaılardyń aldyn alý sharasy JOO-da uıymdastyrylyp jatyr. Osy kúnge deıin 1,5 mln adamdy qamtyǵan 854 ınteraktıvti sabaq jáne jıyn ótti. Odan basqa, «2GIS» kartografııalyq platformasynda (mobıldi qosymsha) elimizdiń barlyq óńirindegi sý aıdyndarynda shomylýǵa tyıym salynǵan (4994) jáne ruqsat etilgen (490) oryndar týraly málimetter ornalastyryldy», - deıdi ol.

Buǵan deıin elimiz boıynsha sýǵa shomylýǵa ruqsat berilgen 490 orynnyń baryn habarladyq.