Qazaqstandyqtar shildede 2,7 myńnan astam altyn quıma satyp aldy
ALMATY. QazAqparat –El turǵyndary 2020 jylǵy shilde aıynda 2700-den astam altyn quıma satyp aldy, dep habarlaıdy QazAqparat QR Ulttyq bankiniń baspasóz qyzmetine silteme jasap.
«2020 jylǵy shildede el turǵyndary ekinshi deńgeıdegi bankterden jáne banktik emes aıyrbastaý pýnkterinen jalpy salmaǵy 113,1 keli 2 712 ólshemdi quıma satyp aldy»,– delingen habarlamada.
Altyn quımalary 5, 10, 20, 50 jáne 100 gramdyq bolyp bes salmaqta satylǵan. Sonyń ishinde eń kóp satylǵany 10 gramdyq quıma.
Onyń satyp alýda Almaty qalasy (satylǵan quımanyń 54%), odan keıin Atyraý (16%), Nur-Sultan (10%) kóshbastady. Basqa óńirlerde bul kórsetkish 20% boldy.
«Keri satyp alýǵa jalpy massasy 3 kelini quraıtyn 114 ólshemdi quıma qabyldandy. Altyn quımalary – ınvestıtsııalaýdyń senimdi quraly. Bankterdiń jáne banktik emes aıyrbastaý pýnkteriniń klıentke «sol kúni» aqsha tóleı otyryp, quımalardy keri satyp alý múmkindigi – altyn quımalary naryǵynyń ótimdiligin qamtamasyz etýdiń negizgi faktory»,– dep habarlady Ulttyq bank.
Qazirgi kezde altyn quımalaryn Halyk Bank-ten, Eýrazııalyq ankten, Jýsan Bank-ten, Bank TsentrKredıtten, sondaı-aq aıyrbastaý pýnkterinen satyp alýǵa jáne olardy qaıta ótkizýge bolady.
Árbir quıma qorǵanysh elementterimen (quımalardyń bet jaǵy aınadaı, mıkromátin jáne bederli gýrt) jáne quımalardy mehanıkalyq zaqymdanýdan qorǵaıtyn jáne oraýy ashylǵanyn nemese ashylmaǵanyn tez anyqtaýǵa múmkindik beretin arnaıy oraýda shyǵarylady. Qorǵanysh oraýy quıma sapasynyń sertıfıkatyn bildiredi.
Ulttyq banki altyn quımasyn satý baǵdarlamasyn 2017 jyly iske qosty. 2017 jyldan bastap jalpy salmaǵy 1,1 tonna 30 855 ólshemdi quıma satyldy.
