Qazaqstandyqtar shetelge ruqsatsyz shyǵa ala ma - UQK jaýap berdi

NUR-SULTAN. QazAqparat – Qazaqstan Respýblıkasynyń azamattaryna shet memleketke shyǵý zańdylyǵy túsindirildi, dep habarlaıdy QazAqparat tilshisi.

«Qazaqstan Respýblıkasynyń shekarasynan ótý týraly erejege sáıkes, bizdiń eldiń azamattary 1 aıda (30 kúnniń ishinde) 1 ret óziniń elden shyǵý sebebin túsindirip, dáleldemeı-aq basqa elge bara alady. Eger azamat atalǵan ýaqyt ishinde elden 1 ret shyǵyp kelip, qaıta shetelge attanǵysy kelse, onda syrt memleketke barý sebebin túsindirýi tıis. Degenmen keı azamattarǵa 30 kúndi kútpeı-aq shetelge barýǵa ruqsat beriledi. Atap aıtqanda, azamat shetelde oqyǵan jaǵdaıda, fors-major bolǵanda ıaǵnı otbasy músheleri nemese jaqyndary aýyryp qalsa nemese qaza tapqanda, em alý maqsatynda (em alýǵa bara jatqanyn dáleldeıtin tıisti qujattary bolýy tıis), sol sııaqty shet memlekette turaqty mekenjaıy bolǵan jaǵdaıda ruqsat beriledi», - dedi QR UQK shekara qyzmeti shekaralyq baqylaý departamenti basshysynyń orynbasary Muńdash Mollashev.

Onyń aıtýynsha, qazaqstandyqtar shetelge shyǵý úshin shekaralyq qyzmettiń 3 túrin qoldana alady. Ol - áýe, avtokólik jáne teńiz qatynasy.

Buǵan deıin UQK shekara qyzmetiniń ókili el azamattary úshin 15 memleketpen áýe qatynasynyń qaıta jolǵa qoıylǵanyn málimdegen bolatyn.