Qazaqstandyqtar sheteldik demalysqa qansha qarajat jumsaıdy

NUR-SULTAN. QazAqparat - Esep komıtetiniń kezekti otyrysynda týrıstik qyzmetti damytýǵa baǵyttalǵan memlekettik qarajattyń tıimdi qoldanylýy týraly memlekettik aýdıt qorytyndysy shyǵaryldy, dep habarlaıdy QazAqparat tilshisi.

Aýdıt QR Mádenıet jáne sport mınıstrliginiń Týrızm ındýstrııasy komıteti men «Kazakh Tourism» AQ qamtyǵan.

«Otandyq týrıstik sala baıaǵydan servıstik ınfraqurylymy damyǵan tanymal sheteldik týrıstik ortalyqtarmen básekelestikte kele jatyr jáne qazir bul salada jumysty jaqsartyp qana qoımaı, uıymdastyrý qurylymyn ózgertý kerek. Iıa, bul qıyn jumys, biraq týrızm berekeli aqshany tez tabatyn sala», - dedi Esep komıtetiniń múshesi Talǵat Jaqan.

QR Ulttyq ekonomıka mınıstrliginiń Statıstıka komıteti keltirgen derekterge sáıkes, jyl saıyn Qazaqstanda shetelderge shyǵý týrızminiń úlesi eldegi týrızm úlesinen bir jarym esege artyp keledi.

Onyń aıtýynsha, kóptegen saýalnamalar boıynsha, qazaqstandyqtar qolaıly baǵa saıasaty, kóliktik jáne logıstıkalyq qoljetimdilik pen kórsetiletin qyzmet sapasy bolǵanda, demalysty Qazaqstanda ótkizgisi keledi.

«Sapasyz ınfraqurylymǵa, qymbat baǵa jáne yńǵaıly qonaqúılerdiń jetispeýine baılanysty Qazaqstan azamattary sheteldik týrıstik ónimderdi artyq kóredi, jyl saıyn orta eseppen 2,7 mlrd AQSh dollary bolatyn ulttyq valıýtamyz ketedi. Munda shetelde laıyqty demalysqa bara alatyn otandastarymyz úshin ǵana qýanýǵa bolady, al shetelge ketetin aqsha Qazaqstan ekonomıkasyna qaıtyp oralmaıdy», - dedi ol.