Qazaqstandyqtar shetelden góri el ishinde kóbirek saıahattaı bastady
ALMATY. QazAqparat - Qazaqstandyqtar shetelden góri el ishinde kóbirek saıahattaı bastady, dep habarlaıdy QazAqparat tilshisi.
Bul málimdeme Almatyda týrıstik sala mamandarynyń qatysýymen ótken dóńgelek ústelde aıtyldy.
Sarapshylardyń aıtýynsha, buǵan ekonomıkalyq jaǵdaı yqpal etip otyr.
Aviata.kz kompanııasynyń basshysy Alekseı Lı 2017 jyly ishki týrızm trafıgi syrtqy týrızmnen asyp turǵanyn jetkizdi.
«Bul teńge kýrsynyń dollarǵa shaqqandaǵy baǵamyna baılanysty bolyp tur. Shetelde demalý burynǵydan qymbat túsedi. Adamdar el ishinde kóbirek saıahattaı bastaǵanyn baıqap otyrmyz. Osyndaı statıstıkaǵa EKSPO-nyń ótip jatqany da áser etse kerek», - dedi Alekseı Lı.
Aviata.kz ókili Astanaǵa barýshylardyń sany tek maýsymda kúrt óskenin aıtty. Arzan bıletter taýsylǵan soń Astanaǵa baratyndar qatary azaıyp qaldy.
Al týrıstik aqparattyq ortalyǵy Ásel Nurkebaevanyń aıtýynsha, qazir Alakól pansıonattarynda demalýshylarǵa oryn joq. Býrabaıda da barlyq qonaqúıler 100 paıyzǵa toly.
«Túrkııada bir apta demalý úshin adam basyna 1000 dollar, 330 myń teńge ketedi. Al Býrabaıda 2 adamǵa 5 kún boıy demalýǵa osy soma ketedi. Oǵan besjuldyzdy qonaq úı, úsh mezgil tamaq kiredi. Qazaqstanda ishki týrızmde aqsha jasaı alatyn 10-15 kompanııa bar», - dedi Ásel Nurkebaeva.
Qazaqstan týrıstik qaýymdastyǵynyń basshysy Rashıda Shaıkenova qazaqstandyqtardyń shetelge shyǵýdy azaıtýynyń birneshe sebebin atady.
«Іshki týrızm damyp keledi. Adamdar ótken jyldary sheteldi kórip aralap tastady. Biraq, óz elinde kóp jerdi kórmegender bar. Sóz joq, qarjylyq faktor da áser etedi. Adamdar, máselen Alakólge jetý úshin barlyǵyna shydaýǵa bar. Óıtkeni, bul anaǵurlym arzan ári kóldiń sýy keremet shıpaly», - dedi Rashıda Shaıkenova.
Onyń aıtýynsha, búgin memleket týrızmdi damytýǵa kóp kúsh salyp otyr. Alaıda, bul jerde memleket kómeginiń qaı jerde bitip, bıznes jaýapkershiligi bastalatynyn uǵyp alýymyz kerek.
«Bizde jappaı týrızm joq. Osyny eskere otyryp, memleket adamdardyń kýrorttarǵa jetýine jaǵdaı jasaýy kerek. Máselen, joldy jóndeý, jeńil avıatsııa kirgizý. Myna turǵan Kólsaı men Qaıyńdyǵa adamdar qazirgiden de tez jetýi tıis. Sol kezde kásipker aqshasynyń qaıtatynyna senimdi bolyp, bankten kredıt alady», - dedi Rashıda Shaıkenova.
Qaýymdastyq ókiliniń bul pikirine «Damý» kásipkerlikti qoldaý qorynyń ókili jaýap berdi.
«Týrıstik salany damytýǵa Almaty týrızm baǵdarlamasy iske qosyldy. Kásipkerler osy baǵdarlama arqyly áriptes bankter - «Halyk bank», «Nurbank», «ATF» bankterinen nesıe ala alady. Osy baǵytta 400 mln teńge bólindi. Kásipkerler eń kóbi 100 mln teńge alady, paıyzdyq mólsherleme 8,5%. Tóleý ýaqyty 3-7 jyl shamasynda. Eń basty shart kepilzat qoıý», - dedi «DAMÝ» ókili.
