Qazaqstandyqtar shetelden 1,8 mlrd dollar aqsha aýdarymyn aldy
"2018 jylǵy qańtar-qarashadaǵy kezeńde Qazaqstanda jeke tulǵalar 637,507 mlrd teńge somasynda (1,8 mlrd AQSh dollary) 1,8 mln.tólemder men aqsha aýdarymdaryn alǵan. 2017 jylǵy osyndaı kezeńmen salystyrǵanda operatsııalardyń sany 36,7 paıyzǵa ósti, al soma 23,5 paıyzǵa tómendedi", - delingen bank málimetinde.
Operatsııalardyń negizgi kólemi óteýsiz aqsha aýdarymdaryna tıesili. Ol 368,8 mlrd teńgeni nemese Qazaqstan Respýblıkasyna kelip túsken tólemderdiń jalpy kóleminiń 57,8 paıyzyn quraıdy. Tıisinshe, óz banktik shottarynyń arasyndaǵy aqsha aýdarymdaryna - 11,2%, baǵaly qaǵazdardy satyp alýǵa - 7,2%, kórsetiletin qyzmetter úshin tólemderge - 2,8%, taýarlar úshin aqy tóleýge - 2,4% jáne basqa da tólemderge - 18,6% tıesili.
Tólemder valıýtasy boıynsha AQSh dollaryna tólemderdiń jalpy kóleminiń 64,5, Reseı rýbline 19,7, eýroǵa 7,3, basqa da valıýtalarǵa 8,5 paıyzy (teńgeni jáne fýnt sterlıngti de qosa alǵanda 11 valıýta) tıesili bolyp otyr. Elder boıynsha kelip túsetin tólemderiń negizgi úlesi Reseıge, Shveıtsarııaǵa, Koreıa Respýblıkasyna, AQSh-qa jáne Lıýksembýrgke tıesili, olardyń jıyntyq úlesi 62 paıyzdy qurady.
Jeke tulǵalardyń paıdasyna Reseıden Qazaqstanǵa jiberilgen tólemderdiń jalpy somasynyń 59,5 paıyzy Reseı rýblimen jáne 29,9 paıyzy AQSh dollarymen jasalǵan. Reseıden alynǵan tólemderdiń qurylymynda óteýsiz aýdarymdar 84,2 paıyzdy qurady. Shveıtsarııadan alynǵan tólemder men aqsha aýdarymdarynyń 89,4 paıyzy AQSh dollarymen, al 9,4 paıyzy eýromen júzege asyrylǵan. Shveıtsarııadan alynǵan tólemder men aqsha aýdarymdarynyń qurylymynda baǵaly qaǵazdardy satyp alý 36,8, menshik shottarǵa aýdarymdar 30,4 paıyzdy qurady. Qalǵan elder boıynsha Qazaqstanǵa jiberilgen operatsııalardyń basym kólemi AQSh dollarymen jasalǵan: Koreıa Respýblıkasy - 98,9, AQSh - 99,3, Lıýksembýrg - 97,5 paıyz.