Qazaqstandyqtar shet elge shyqqanda kóligin qalaı saqtandyra alady
ASTANA. QazAqparat - QR Ulttyq bank tóraǵasynyń orynbasary Janat Qurmanov Parlament Májilisinde saqtandyrý qyzmeti boıynsha tanystyrǵan zań jobasy arqyly shet elge shyǵatyn qazaqstandyqtar avtokólikterin qalaı saqtandyra alatynyn aıtyp berdi, dep habarlaıdy «QazAqparat» HAA tilshisi.
Aıta ketsek, Janat Qurmanov Parlament Májilisinde «QR keıbir zańnamalyq aktilerine saqtandyrý jáne saqtandyrý qyzmeti máseleleri boıynsha ózgerister men tolyqtyrýlar engizý týraly» zań jobasyn tanystyrǵan bolatyn. Parlament Májilisiniń depýtattarymen atalǵan zań jobasyn talqylaý barysynda depýtattar qazaqstandyqtardyń shet elge shyqqanda avtokólikteriniń saqtandyrý polısiniń kúshi bolmaıtynyn, osy sebepti másele týyndap jatatynyna alańdaýshylyq bildirdi.
Bul máseleniń sheshýdiń Janat Qurmanovtyń aıtýynsha úsh joly bar.
«Transhekaralyq saqtandyrý degen bizdiń kórshiles eldermen ıntegratsııaǵa túsý aıasynda saqtandyrý kompanııalary úshin óte mańyzdy másele. Bir ǵana Reseımen 7 myń shaqyrymda shektesip jatyrmyz. Bul turǵyda birneshe baǵyt boıynsha jumys júrip jatyr. Eń birinshi kezekte, biz Qazaqstanǵa «jasyl karta» jobasyna qatysý kerek pe joq pa degen máselege qatysty saraptama júrgizdik. Demek, «jasyl kartaǵa» engen memlekettiń azamattary (ol kartada Reseı men Belarýs elderi, Eýropa memleketteri bar) qosymsha saqtandyrýǵa muqtaj bolmaıdy. Qazaqstan «jasyl kartaǵa» ense, onda bizdiń azamattardyń kólikteriniń saqtandyrý polısi atalǵan elderde kúshin joımaıdy. Sondyqtan, bul máseleni talqylap jatyrmyz», - deıdi ol.
Janat Qurmanovtyń aıtýynsha, máseleni sheshýdiń ekinshi joly EAEO aıasynda saqtandyrý uıymdary polısteriniń osy odaqqa kiretin elderde ortaq moıyndalýy týraly kelisimge qol jetkizý.
«Demek, eger bizdiń eldegi klıent Qazaqstanda saqtandyrý týraly kelisimge kelse, bul polıstiń Reseıde de kúshi bar bolady. Úshinshiden osy zań jobasy aıasynda men sizderge tanystyrǵan onlaın-saqtandyrý júıesi. Demek, eger qazaqstandyq azamat shet elge shyqpaı turyp, onlaın-saqtandyrýdy satyp alsa, onda bul suraqtar sheshiledi. Menińshe, shet elge shyǵatyn azamattarǵa osy júıe tıimdi. Sebebi mundaı joldy bizdiń zańnamamen úılestirý qajettiligi týyndamaıdy. Eger saqtandyrý polısteriniń moıyndalýy jolyn tańdasaq, Qazaqstandaǵy jáne Reseıdegi saqtandyrý kompanııalarynyń sharttary, baǵalary ártúrli ekenin eskerýimiz kerek. Sondyqtan onlaın-saqtandyrý joly áldeqaıda tıimdi der edim»,- deıdi Janat Qurmanov.
