Qazaqstandyqtar shelek laqtyrmaıdy dep senemin - Brendon Kýk
ASTANA. QazAqparat - Kanadalyq boksshy Brendon Kýk (18-0, 11 KO) qazaqstandyq Qanat Islammen (24-0, 19 KO) alda ótetin jekpe-jegine qatysty pikir bildirdi, dep habarlaıdy Sports.kz.
«Bul aýyr jekpe-jek bolary anyq, alaıda Qanat tarapynan jasalatyn barlyq usynystarǵa daıynbyz. Biz Kanadadan tys, basqa elderden aıqas alańyna shaqyrtýdy kóp kúttik. Endi jarty álemdi aınalyp ótip Qazaqstanǵa kelýge týra keldi, alaıda ol mańyzdy emes. Bul «Rokkı-4» fılmindegideı bolaıyn dep tur», - dedi Kýk.
«Stıven Batlermen bolǵan sońǵy aıqasymda meniń tarapymnan jasalǵan nokaýt jankúıerlerge múlde unaǵan joq. Aqyry jekpe-jek jankúıerdiń maǵan shelek laqtyrýymen aıaqtaldy. Qazaqstandyqtar monrealdyq jankúıerlermen salystyrǵanda baısaldyraq bolady dep senemin», - dedi ol.
Islam - Kýk jekpe-jegi 9 qyrkúıek kúni Astanada ótedi.
