Qazaqstandyqtar saılaýǵa belsene qatysatynyna senemin - Anatolıı Vybornyı

NUR-SULTAN. QazAqparat - Reseı memlekettik Dýmasynyń depýtaty, halyqaralyq baıqaýshy Anatolıı Vybornyı «Qazaqstan Respýblıkasyndaǵy saılaý týraly» Zańnyń ýaqyt talabyna sáıkestigine qatysty óz pikirin bildirdi, dep habarlaıdy QazAqparat tilshisi.

«Ujymdyq qaýipsizdik týraly shart uıymynyń parlamenttik delegatsııa quramynda Armenııa, Belarýs, Qyrǵyzstan, Tájikstan jáne Reseı parlamentteriniń músheleri bar. Olardyń barlyǵynyń saılaýǵa qatysýshy halyqaralyq baıqaýshylar retinde tájirıbeleri mol. Onyń ishinde bizdiń baıqaýshylar Qazaqstanda ótken osyǵan deıingi prezıdenttik saılaýǵa da qatysty. Osy ýaqyt aralyǵynda biz Qazaqstannyń saılaý týraly zańnamasymen jaqsy tanyspyz. Jáne zańnama ýaqyt talabyn buzbaıdy, eń bastysy saılaý protsesiniń ýaqyty Qazaqstan men halyqaralyq zańnamanyń talaptaryna sáıkes keledi», - dedi A. Vybornyı búgin Ortalyq saılaý komıssııasynda ótken baspasóz máslıhatynda.

Odan bólek, halyqaralyq baıqaýshy qazaqstandyqtardyń saılaýǵa belsendi qatysatynyna senim bildirdi.

«Biz Qazaqstandaǵy kezekti prezıdent saılaýyna baıqaýshy retinde qatysatynymyzǵa qýanyshtymyz. Qazaqstandyqtar saılaýǵa qatysýda joǵary deńgeıde belsendilik tanytatynyna senemin. Jáne ol saılaý qorytyndysynda óz nátıjesin beredi. Biz úshin mańyzdysy - saılaýdyń Qazaqstan men halyqaralyq saılaý týraly zańnama talaptaryna sáıkes ótýi. Óz tájirıbemnen aıtarym, buǵan deıingi saılaý boıynsha baıqaýshylar nemese halyq tarapynan eshqandaı kúdik bolǵan emes», - dedi ol.

Onyń aıtýynsha, búginde Qazaqstanǵa Ujymdyq qaýipsizdik týraly shart uıymynan bólek, TMD jáne ShYU ókilderinen quralǵan baıqaýshylar kelip jetti.