Qazaqstandyqtar saılaýdy onlaın rejıminde talqylaýǵa múmkindik aldy
ASTANA. QazAqparat - Qazaqstanda aldaǵy prezıdenttik saılaýdy talqylaýǵa arnalǵan biregeı platforma ashyldy. Onlaın rejımindegi jańa saıyt azamattarǵa saılaý taqyrybyn talqyǵa salýǵa múmkindik beredi.
«Mende azamattar úshin saılaý taqyrybyndaǵy qyzyqty pikirtalastarǵa qatysý múmkindigin qurý ıdeıasy týyndady. Qazirgi kezde saıttaǵy barlyq talqylaýlardy paıdalanýshylardyń ózderi quryp otyr. Odan basqa, paıdalanýshylar jańalyqtardy, ózderiniń maqalalary men oılaryn ornalastyra alady», - dep baıandady blogger ári saıtty qurýshy Baýyrjan Sádıev.
Saıt avtorynyń aıtýynsha, resýrs barlyq áleýmettik jelilermen yqpaldastyrylǵan, bul paıdalanýshylar úshin qosymsha múmkindikter beredi.
Esterińizge sala keteıik, blogger Baýyrjan Sádıev prezıdenttik saılaýǵa arnalǵan saıt qurdy. Kommertsııalyq bolyp tabylmaıtyn memlekettik emes saıt election2015.kz. elektrondyq mekenjaıynda ornalasqan.
B.Sádıevtiń atap ótýinshe, saıt saılaýaldy naýqan, saılaýdyń ózine «sheneýnikter nemese partııalyq belsendilerdiń kúshimen emes, tikeleı el azamattarynyń kúshimen» nazar aýdartý úshin quryldy.
Saıtta birneshe qyzmet, sonyń ishinde túrli saılaýaldy taqyryptarǵa - «Kandıdattardy talqylaý», «Saılaýshylardyń tizimderi», «Eń belsendi oblys» jáne taǵy basqalary arnalǵan chattar bar.
Sondaı-aq saıtta «Paıdalanýshylardyń jańalyqtary» bólimi bar: bul jerde kez kelgen azamat qyzyqty jańalyq ornalastyryp, ony basqalarmen bólise alady. Arnaıy áleýmettik bólimde Tvıtterde saılaýaldy heshtegtermen biriktirilgen barlyq jańalyqtar kórsetiledi, dep atap ótti saıtty qurýshy.
