Qazaqstandyqtar saılaýda patrıottyq tanytýda - tarıhshy Karl Baıpakov
ALMATY. QazAqparat - QR BǴM Á. Marǵulan atyndaǵy Arheologııa ınstıtýtynyń qurmetti dırektory, QR UǴA akademıgi, tarıh ǵylymdarynyń doktory, professor Karl Baıpaqov QR prezıdenttik saılaýda daýys berdi.
«Prezıdent saılaǵan kezde, alda ne kútip tur degen suraq týyndaıdy. Álemde kúrdeli jaǵdaı. Saıası jaǵdaı kún sanap qubylýda. Biz jáne kóptegen elder qıyndyqty bastan ótkerýdemiz. Sondyqtan judyryqtaı jumylýymyz qajet», - dep tarıhshy oıymen bólisti. Ol qazirgideı kúrdeli kezeńde kóp jumys isteý qajettigin qosty.
«Bizdiń maqsatymyz bıik - ómir súrý deńgeıimizdi arttyryp, álemdegi ozyq eldermen ıyq tirestirýimiz qajet. Ol úshin áleýetimiz de myqty bolýy shart. Biz alǵa jyljý úshin maqsatymyzdy aıqyndap aldyq», dep jalǵastyrdy K. Baıpakov.
Tarıhshy búgin saılaýshylardyń ishinde egde adamdar da jastar da bolǵanyn atap ótti. Onyń pikirinshe, bul qazaqstandyqtardyń eldegi saıası jaǵdaıǵa beı-jaı qaramaıtyndyǵyn kórsetedi.
«Táýelsizdik jyldary mentalıtet, psıhologııa ózgerdi. Óz-ózimizge senimdiligimiz, bilimimiz, saýatymyz artty. Tıisinshe, saılaý da sapaly uıymdastyrylyp, adamdardyń boıynda patrıottyq sezim uıalaǵan. Patrıottyq - úderistiń qýatty qozǵaýshy kúshi, solaı bolǵan, bolyp ta qala beredi», - dedi ol.
