Qazaqstandyqtar «Sáýir aıynyń úzdik sportshysyna» daýys berýde
NUR-SULTAN. QazAqparat – QR Ulttyq Olımpıada komıteti «Sáýir aıynyń úzdik sportshysyna» daýys berý bastalǵanyn jarııalady, dep habarlaıdy QazAqparat.
Sáýir aıy qazaqstandyq sportshylar úshin óte tartysty ótti. Otandyq atletter ótken aıda halyqaralyq arenada el namysyn abyroımen qorǵap, komanda qorjynyn medalmen tolyqtyrdy. Jeńip alǵan júldelerdiń árqaıssy ózdiginshe qundy, erekshe. Ásirese, Olımpıada maýsymy qarsańynda tórt jyldyqtyqtyń basty dodasyna bir taban jaqyndaǵandyqtan árbir júldeniń salmaǵy arta túsýde.
Daýys berý Olympic.kz saıtynyń negizgi betinde ótýde jáne 8 mamyr, Nur-Sultan ýaqytymen saǵat 13:00-ge deıin jalǵasady.
«Sáýir aıynyń úzdik sportshysy» ataǵyna 6 qazaqstandyq úmitker:
Abıba Abýjaqynova, dzıýdo
Bıylǵy Azııa jáne Okeanııa chempıonatynda Abıba Abýjaqynova Qazaqstan quramasynyń qorjynyna kúmis medal syılady. Ol fınalǵa deıin qarsylas shaq keltirmeı, tek aqtyq synda qarsylasyna ese jiberdi. Aıta keterligi, osy ýaqytqa deıin jastar sapynda kúresken Abıba bıyl eresekter arasyndaǵy Azııa chempıonatyna birinshi ret qatysyp, birden jeńis tuǵyrynan kórindi.
Nursýltan Tursynov, grek-rım kúresi
Sáýir aıynyń basynda Almatyda kúres túrlerinen Azııa irikteý týrnıri ótti. Qurlyqtyq irikteý dodasynda 87 kelige deıingi salmaq dárejesinde top jarǵan Nursultan Tursynov grek-rım kúresinen Qazaqstan komandasyna Tokıo Olımpıadasynyń joldamasyn ákeldi. Jartylaı fınalda úndistandyq Sýnıl Kýmardy jeńip, fınalǵa shyqty. Jarys erejesi boıynsha, Azııa irikteý týrnıriniń fınalyna shyqqandar Olımpıada lıtsenzııasyna ıelik etedi. Aıta keterligi, kúres túrlerinde Olımpıada oıyndaryna joldama sportshyǵa emes, komandaǵa beriledi.
Tatıana Ahmetova, áıelder kúresi
Almatyda ótken Azııa irikteý týrnırinde #teamKZ qorjynyna taǵy bir joldama tústi. Kúresten áıelder qurama komandasynyń múshesi Tatıana Ahmetova erlikpen joldamany jeńip aldy. Ol jaraqatyna qaramastan jartylaı fınalda qarsylasynan 11:1 esebimen jeńisti julyp aldy. Nátıjesinde, Tatıana 53 kelige deıingi salmaq dárejesinde Tokıo Olımpıada oıyndarynyń joldamasyn Qazaqstan qorjynyna syılady.
ıÝsýp Batyrmýrzaev, erkin kúres
Kúres túrlerinen Almatyda ótken qurlyqtyq básekede Qazaqstanǵa úshinshi joldamany erkin kúres sheberi ıÝsýp Batyrmýrzaev ákeldi. 125 kelige deıingi salmaq dárejesinde baq synaǵan ol Olımpıada joldamasymen qatar, jarys jeńimpazy da atandy. Joldamany ol jartylaı fınaldyq beldesýde úndistandyq Samıt Samıtti utyp, jeńip aldy.
Elena Potapenko men Vladıslav Mışenko, qazirgi bessaıys
Qazirgi bessaıystan Qazaqstan qurama sportshylary úshin Sofııadaǵy álem kýbogi sátti aıaqtaldy. Qazaqstandyq sportshylar Elena Potapenko men Vladıslav Mışenko mıkst-estafetasy boıynsha altyn jeńip aldy. Atalǵan jarysqa barlyǵy 19 komanda qatysty. Júzý, semserlesý, atpen júrý jáne lazer-ran boıynsha el quramasy 1442 upaı jınap, jarysta top jardy.
Arlı Chonteı, aýyr atletıka
Ózbekstanda aýyr atletıkadan ótken Azııa chempıonatynda Qazaqstan komandasynyń qorjynyna altyn medaldi Arlı Chonteı jeńip aldy. 55 kelige deıingi salmaq dárejesinde baq synaǵan ol qossaıys nátıjesi boıynsha 225 (115+140) kelini baǵyndyrdy. Dál osy jetistik Qazaqstannyń jeńis tuǵrynynan kórinýge múmkindik syılady.
