Qazaqstandyqtar sapasyz dári-dármekke baılanysty qaıda shaǵym túsire alady
OKQ-da ótken baspasóz máslıhatynda QR DSM Dárilik zattardy, medıtsınalyq maqsattaǵy buıymdardy jáne medıtsına tehnıkasyn ulttyq saraptaý ortalyǵy bas dırektorynyń mindetin atqarýshy Qanat Erjanov bul másele týraly keńirek aıtyp berdi. Onyń aıtýynsha, ótken jyly da ulttyq ortalyq elge kirgizilgeli turǵan dári-dármekter men medıtsınalyq buıymdarǵa saraptama júrgizgen. Saraptama barysynda keıbir tasymaldaýshylar dári-dármekterin tirkeýden bas tartqan. Osyǵan baılanysty ol ónimder sapasyz dári-dármekter men medıtsınalyq buıymdar dep tanylyp, Qazaqstannyń naryǵyna kirgizilmegen.
«Otandyq densaýlyq salasynda tsıfrlyq tehnologııalardy engizý mindettemesine sáıkes, 2018 jyly ulttyq ortalyq dári-dármekterge saraptama júrgizý úshin jasandy ıntellektti qoldaný boıynsha pılottyq jobany bastady. Bul qadam saraptama júrgizý ýaqytyn edáýir qysqartady. Qazirgi ýaqytta dárilik zattar men medıtsınalyq buıymdardy saraptaý jumysyn transformatsııalaý protsesi bastalyp ketti», - deıdi ol.
Sonymen birge, Qanat Erjanovtyń aıtýyna qaraǵanda, ulttyq ortalyqtyń 2018 jyly júrgizilgen taldaý jumystary kórsetkendeı, Qazaqstanda ótken jyly dárilik zattardyń janama áser bergeni týraly 3200 habarlama kelip túsken.
«Osy shaǵymdardyń izimen medıtsınalyq preparattar tolyǵymen tárkilendi. Bizge azamattar ártúrli jaǵdaılarmen habarlasady. Shaǵym túsken medıtsınalyq preparattardy biz mindetti túrde zerthanada tekseremiz. Eger qabyldaǵan dárilik zattarǵa baılanysty qandaı da bir shaǵymdar bolsa, bizdiń saıt arqyly ulttyq ortalyq qyzmetkerlerimen baılanysqa shyǵýǵa bolady», - dedi Qanat Erjanov.
Eske sala ketsek, buǵan deıin Qanat Erjanov Qazaqstanǵa jetkiziletin sheteldik dári-dármekterdiń sapasy qalaı qadaǵalanyp jatqanyn aıtyp bergen bolatyn.