Qazaqstandyqtar salyqtyq raqymshylyq aıasynda 5,5 mlrd teńge bereshegin ótegen

NUR-SULTAN. QazAqparat - Jalpy, ósimpuldardy esepten shyǵarý aktsııasy bastalǵan kezde 1,5 mln jeke tulǵanyń jalpy qaryzy 26,3 mlrd teńge, onyń ishinde negizgi qaryz somasy 21,8 mlrd teńge, al ósimpul 4,5 mlrd teńgeni quraǵan bolatyn, dep habarlady QR QM Memlekettik kirister komıtetinen.

Vedomstvoda atap ótkendeı, ósimpuldardy esepten shyǵarýǵa arnalǵan aktsııanyń aıaqtalýyna eki aıdan az ýaqyt qaldy.

Aǵymdaǵy jyldyń 6 qarashadaǵy jaǵdaı boıynsha salyqtyq raqymshylyq múmkindikterin 400 myńǵa jýyq jeke tulǵa paıdalandy, olar 5,5 mlrd teńge kólemindegi bereshekterin ótep, 612,2 mln teńge ósimpul esepten shyǵaryldy.

Almaty qalasy kólik salyǵy boıynsha ósimpuldardy esepten shyǵarýda kóshbasshylardyń qatarynda. Ońtústik megapolıstiń turǵyny 2,3 mln teńge qaryzyn tólep, oǵan 1,6 mln teńgege jýyq ósimpul keshirildi.

Sonymen qatar, Shymkent qalasynyń turǵyny jer salyǵy boıynsha 1,4 mln teńge mólsherinde negizgi qaryz somasyn tólegen, osylaısha ol 209 809 teńge somasynda ósimpuldan bosatylǵan.

Múlik salyǵy boıynsha ósimpuldardy esepten shyǵarý reıtıngin Nur-Sultan qalasynyń turǵyny bastap tur. 260 myń teńgeden asqan ósimpuldan qutylý úshin ol 515 586 teńge negizgi qaryzdy tóledi.

MKK jyl sońyna deıin salyqtar boıynsha negizgi qaryzdy tólegen jaǵdaıda ósimpuldy esepten shyǵarý boıynsha raqymshylyq qoldanylatynyn eske salady.

Salyqtyq raqymshylyq júrgizý merzimi 2020 jylǵy 31 jeltoqsanǵa deıin.

Ósimpuldy esepten shyǵarý úshin eshqaıda barýdyń qajeti joq. Qaryzdyń negizgi somasyn tóleý jetkilikti. Ósimpul avtomatty túrde esepten shyǵarylady. Memlekettik kirister organdarynyń barlyq aýmaqtyq bólimshelerinde ósimpuldardy esepten shyǵarý jónindegi komıssııalar quryldy.

Salyqtar boıynsha bereshektiń bar/joq ekendigi týraly málimetterdi QR QM Memlekettik kirister komıtetiniń saıtynda, sondaı-aq eSalyq mobile (AppStore, PlayMarket) mobıldi qosymshasy arqyly tekserýge bolady.