Qazaqstandyqtar salyq raqymshylyǵy aıasynda 10 mlrd teńgeden astam salyq tóledi

NUR-SULTAN. QazAqparat – Memlekettik kirister komıtetiniń aýmaqtyq departtamentterinde qurylǵan arnaıy komıssııalar negizgi salyq somasyn tólegen jeke tulǵalarǵa 2020 jyldyń 27 tamyzynan bastap ósimpuldardy esepten shyǵarýǵa kirisken, dep habarlaıdy QazAqparat komıtettiń baspasóz qyzmetine silteme jasap.

Baspasóz qyzmetiniń derekterine qaraǵanda, 2020 jylǵy 20 jeltoqsandaǵy jaǵdaı boıynsha 720 419 jeke tulǵa 10,2 mlrd. teńge somasynda salyqtyń negizgi qaryzyn tóledi. 1,2 mlrd teńge ósimpul esepten shyǵaryldy.

Salyqtyq raqymshylyq úrdisi bastalǵan kezde 1,5 mln jeke tulǵanyń jalpy qaryzy 24,6 mlrd teńgeni, onyń ishinde negizgi qaryz somasy 20,3 mlrd teńge, ósimpul 4,3 mlrd teńgeni qurady.

MKK jyl sońyna deıin salyqtar boıynsha negizgi qaryzdy tólegen jaǵdaıda ósimpuldy esepten shyǵarý boıynsha raqymshylyq qoldanylatynyn eske salady.

Salyqtyq raqymshylyq júrgizý merzimi - 2020 jylǵy 31 jeltoqsanǵa deıin belgilengen.

Ósimpuldy esepten shyǵarý úshin eshqaıda barýdyń qajeti joq. Qaryzdyń negizgi somasyn tóleý jetkilikti. Ósimpul avtomatty túrde esepten shyǵarylady. Memlekettik kirister organdarynyń barlyq aýmaqtyq bólimshelerinde ósimpuldardy esepten shyǵarý jónindegi komıssııalar quryldy.

«Salyqtar boıynsha bereshektiń bar/joq ekendigi týraly málimetterdi QR QM Memlekettik kirister komıtetiniń saıtynda siltemesi boıynsha, sondaı-aq eSalyq mobile (AppStore, PlayMarket) mobıldi qosymshasy arqyly tekserýge bolady»,-delingen habarlamada.