Qazaqstandyqtar Reseı halqyna áýe apatyna baılanysty kóńil aıtýda
ASTANA. QazAqparat - Qazaqstandyqtar Reseı elshiliginiń aldyna gúl ákelip jatyr. Astanadaǵy elshiliktiń aldyndaǵy stolǵa gúl qoıyp ketip jatyr.
Osyǵan deıin Memleket basshysy Reseı Federatsııasynyń prezıdenti Vladımır Pýtınge Qorǵanys Mınıstrligi ushaǵynyń apatqa ushyrýyna baılanysty kóńil aıtqan bolatyn. Reseı prezıdenti Vladımır Pýtın 26 jeltoqsandy Jalpyulttyq aza tutý kúni dep jarııalady. Osy oqıǵaǵa baılanysty QR Mádenıet jáne sport mınıstri Arystanbek Muhamedıuly óziniń Facebook áleýmettik jelisindegi paraqshasy arqyly kóńil aıtty.
«Adamdardyń apattan mert bolýy qashanda qaıǵyly. Al, osy joly bolǵan oqıǵa erekshe aýyr tıip otyr. Apatqa ushyraǵan ushaqta mert bolǵan azamattardyń barlyǵy qalyń kópshilikke jaqyn tanys jáne kópshiligi eldiń súıktisine aınalyp úlgergen jandar edi. Qurban bolǵandardyń kópshiligi álemge áıgili Aleksandrov ansambli horynyń qatysýshylary. Bul ǵasyrǵa jýyq tarıhy bar teńdessiz áskerı-mýzykalyq ujym. Bul qandaı bolmasyn qıyn-qystaý kúnderde, tipti soǵys oshaqtaryna baryp ta jaýyngerlerdi qoldap, qolpashtap júrgen tanymal ujym. Ansambl mádenı dıplomatııamen aınalysty. Olar qalyń kópshilikke bar jan-tánderimen óner kórsetti. Bul orny tolmas qaza»,-dep jazdy ol.
Osyǵan deıin habarlanǵanyndaı, RF qorǵanys mınıstrliginiń Tý-154 ushaǵy Sochıden Sırııaǵa ushyp shyǵyp, 25 jeltoqsan kúni Qara teńiz aımaǵynda apatqa ushyrady. Ushaqtyń bortynda 92 adam bolǵan. 
