Qazaqstandyqtar polıtsııaǵa óz erikterimen 53 myń qarý-jaraq tapsyrdy

NUR-SULTAN. QazAqparat – 2008 jyldan beri qarý-jaraqtardy óz erikterimen polıtsııaǵa ótkizgen el turǵyndaryna 1,7 mlrd teńge syıaqy berildi. Bul týraly QR ІІM Ákimshilik polıtsııa komıtetiniń bólim bastyǵy Asylbek Ydyrysov aıtty, dep habarlaıdy QazAqparat tilshisi.

«2008 jyldan bastap turǵyndardyń zańsyz saqtalǵan qarý-jaraq zattaryn satyp alý aktsııasy júrgizilip keledi. Osyndaı aktsııalardyń nátıjesinde halyq aqshalaı syıaqyǵa óz erikterimen 53 myńnan astam atys qarýy jáne ıir oıyqty myltyqqa arnalǵan 2 mln danadan astam oq tapsyrdy. Oǵan jalpy somasy 1,7 mlrd teńgege jumsaldy», - dedi.

Onyń atap ótýinshe, bıyl da dál osyndaı aktsııa 20 sáýirde bastaldy. Aktsııa aıasynda memleket el turǵyndarynan zańsyz qarý-jaraq pen oq-dári satyp alý úshin 95 mln teńgeden astam qarajat bóldi.

«Azamattar polıtsııa organdaryna óz erikterimen 1 381 atys qarýyn, ıir oıyqty myltyqqa arnalǵan 57 292 oq, sonymen qatar 11 jarylǵysh qurylǵy jáne 15 keli jarylǵyz zat tapsyrdy. Olardyń jalpy quny 91 mln 467 myń teńgeni quraıdy»,- dedi bólim bastyǵy.

Asylbek Ydyrysovtyń atap ótýinshe, azamattar ótkizgen qarý-jaraqqa tólenetin soma 30 myńnan 300 myń teńgege deıin bolady.