Qazaqstandyqtar paraǵa qansha aqsha beredi

ASTANA. QazAqparat - Aǵymdaǵy jyldyń 8 aıynda Sybaılas jemqorlyqqa qarsy kúres boıynsha ulttyq bıýro 1393 jemqorlyq qylmysyn tirkedi.  Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttiginen málim etti, dep habarlaıdy QazAqparat tilshisi.

«Aǵymdaǵy jyldyń 8 aıynda Ulttyq bıýro 1393 jemqorlyq qylmysty tirkedi. Onyń 761-i paraqorlyq faktisi boldy. Al para alý faktisi 555 ret tirkeldi. Parany alýshymen qatar parany bergen adam da qylmystyq jaýapkershilikke tartylatyndyǵyn túsiný qajet.  Máselen, para berýdiń 157 faktisi jáne para berýge deldaldyqpen baılanysty 49 qylmys anyqtaldy», - dep atap ótedi agenttikten.

Vedomstvo málimetinshe, qylmystyq is boıynsha para kólemi 5 myńnan bastalyp 30 mln teńgeden asyp jyǵylady. Al urlanǵan qarajat kólemi 10 myń teńgeden bastalyp, 3 mlrd teńdegen astam somany quraıdy.

«Sonymen qatar senip tapsyrylǵan ózgeniń múlkin ıemdený jáne talan-tarajǵa salý, alaıaqtyq, qylmystyq jolmen alynǵan aqsha jáne ózge de múlikterdi zańdastyrý, ekonomıkalyq kontrabanda, laýazymdyq ókilettikti asyra paıdalaný, kásipkerlik qyzmetke zańsyz aralasý, qyzmettik aldaý syndy faktilerdiń joly kesildi», - dep atap ótedi agenttikten.

Munan bólek, aǵymdaǵy jyldyń 8 aıynda qurylys salasynda jemqorlyqtyń kóp oryn alatyndyǵy anyqtalǵan. Bul salada 157 jemqorlyq quqyqbuzýshylyq, bilim salasynda - 110, jer qatynastary salasynda - 101, aýyl sharýashylyǵynda 95 quqyqbuzýshylyq áshkere boldy.