Qazaqstandyqtar para berýdi azaıtty - saýalnama
ASTANA. QazAqparat - Qazaqstanda óz máselesin para arqyly sheshýge tyrysatyn adamdardyń sany azaıyp keledi. "Trancparency Kazakhstan" qoǵamdyq qory ótkizgen áleýmettik zertteý osyny aıǵaqtaıdy, dep xabarlaıdy QazAqparat.
Zertteý nátıjesi Qaraǵandy qalasynda ótken forýmda jarııalandy.
"Biz arnaıy zertteý júrgizdik. Oǵan sáıkes, buryn para bergen adamdardyń úshten biri óz kózqarasyn ózgertip, bireýdiń alaqanyn maılaýdy qoıdy. Bunyń ózi azamattardyń jemqorlyqtan aýlaq júrýge tyrysatynyn kórsetip otyr. Olardyń kózqarasy ózgerdi. "Para bergen durys emes" degen naqty azamattyq ustanym qalyptasty", - dedi qordyń qamqorshylyq keńesiniń tóraǵasy, Qazaqstannyń 2015-2025 jyldarǵa arnalǵan Sybaılas jemqorlyqqa qarsy strategııasynyń arnaıy monıtorıng tobynyń múshesi Marat Shıbýtov.
Qaraǵandy oblysy boıynsha Memlekettik qyzmet isteri jáne sybaılas jemqorlyqqa qarsy is-qımyl departamentiniń basshysy Jandos Sársenovtyń oıynsha, munyń barlyǵy - jemqorlyqqa qarsy tıimdi jumystyń nátıjesi. Profılaktıka da óz septigin tıgizip otyr.
"Biz joǵary oqý oryndaryn aralap, stýdentterge sessııany «aqshamen sheshken» durys emes ekendigin únemi túsindirip otyramyz. Oqý oryndarynda arnaıy ombýdsmender bar. Ol qyzmetti departament qyzmetkerleri atqarady. Olar stýdentter arasynda túsindirý jumystaryn júrgizedi. Oblys boıynsha 120 banner ornatyldy. Avtobýs aıaldamalary men xalyq kóp júretin jerlerde daýys zoraıtqyshtary arqyly jemqorlyqtyń qanshalyqty zııan ekenin túsindirip turamyz", - dep atap kórsetti Sársenov.
Aıta keteıik, 9 jeltoqsanda álem elderi Halyqaralyq jemqorlyqqa qarsy kúnin atap ótedi. 2001 jyly Meksıkada ótken BUU-nyń Búkilálemdik konferentsııasynda tıisti konventsııa qabyldanǵan bolatyn.
