Qazaqstandyqtar óziniń is-qımylymen dollarsyzdanýǵa múmkindik berdi - Tımýr Súıleımenov

ASTANA. QazAqparat - QR Ulttyq ekonomıka mınıstri Tımýr Súleımenov teńge men dollar baǵamyna qatysty pikir bildirdi, dep habarlaıdy QazAqparat tilshisi.

«Ózderińiz baıqaǵandaı, bizde dollarsyzdaný protsesi aıtarlyqtaı sátti ótti», - dedi T. Súleımenov Úkimet otyrysynan keıin tilshilerge.

Onyń sózine qaraǵanda, buǵan ózindik óndiris úlesiniń artýy sebep boldy.

«Birinshiden, biz ózimizdiń óndiristi ósirdik. Ásirese, azyq-túlik taýarlary boıynsha ilgerileý bolǵandyqtan, valıýta baǵamyna táýeldi emespiz», - dedi mınıstr.

Vedomstvo basshysynyń atap ótýinshe, eń mańyzdysy, qazaqstandyqtar dollarǵa táýeldilik qursaýynan bosap keledi.

«Eń bastysy, ónim qunyn teńgemen eseptep otyrǵan bıznesmenderdiń jáne bizdiń kúsh-jigerimizge oraı dollarsyzdaný iske asty. Atap aıtqanda, barlyq iri zattardy, ıaǵnı avtokólikti, páterdi jáne basqa da qundy zattardy teńgemen ólshep jatyrmyz», - dedi Ulttyq ekonomıka mınıstri.

Sondaı-aq Tımýr Súleımenov ınflıatsııamen kúres jaıynda baıandap berdi.

Sonymen qatar ol Qazaqstanda qant baǵasynyń maýsymdyq qymbattaýyna qatysty túsinik berdi.