Qazaqstandyqtar óz úıinde kimniń tirkelgenin qosymsha arqyly bile alady
NUR-SULTAN. QazAqparat - Qazaqstandyqtar óz úıinde kimniń qashan tirkelip, shyǵyp ketkenin mobıldik qosymsha arqyly bile alady. Bul týraly halyqqa esep berý kezdesýinde Іshki ister mınıstri Erlan Turǵymbaev aıtty, dep habarlaıdy QazAqparat tilshisi.
«Іshki ister mınıstrligine quqyq qorǵaý mindetimen birge azamattarǵa memlekettik qyzmetterdi usyný júktelgen. Qazirgi tańda biz osyndaı qyzmetterdiń 40 túrin kórsetemiz. 2018 jyly ǵana halyqqa 17 mln qyzmet kórsettik. Jyl basynan beri 6 mln qyzmet kórsetildi. Olardyń basym kópshiligi mıgratsııaǵa, jeke kýálik pen pasportty resimdeýge, turǵylyqty mekenjaıǵa tirkeý jáne jol qozǵalysy boıynsha avtokólikti tirkeýge, júrgizýshiler kýáligin alýǵa qatysty qyzmetter. 5 mln tarta qyzmet memlekettik korporatsııa men 1 mln qyzmet elektrondy úkimet arqyly kórsetildi», - dedi Erlan Turǵymbaev halyqqa esep berý kezdesýinde.
Mınıstrdiń aıtýyna qaraǵanda, ótken jyly aqparattyq júıelerdiń ıntegratsııalanýy aıaqtalyp, elektrondy úı kitapshasy ázirlengen.
«Endigi kezekte úıdiń qojaıyny óziniń páterinde kimderdiń tirkelgenin arnaıy HQO-lardan ǵana emes, mobıldi úkimet (egov.kz) servısi arqyly telefonynan jáne planshetinen bile alady. Demek, eshqaıda shyqpaı-aq mobıldik qosymsha arqyly azamattar óz úıinde kimniń qashan tirkelgenin, qashan shyǵyp ketkenin bile alady», - dedi mınıstr.
