Qazaqstandyqtar óz erkimen 1 400 atys qarýyn tapsyrdy
NUR-SULTAN. QazAqparat – Elimizde «Qarý» aktsııasy aıaqtaldy. Bul týraly QR Іshki ister mınıstrliginiń resmı ókili Nurdildá Oraz málim etti, dep habarlaıdy QazAqparat tilshisi.
«Іshki ister mınıstrligi bıylǵy jyldyń 20 sáýirinen bastap ótkizilgen jyl saıynǵy «Qarý» aktsııasyn aıaqtady. Aktsııa barysynda azamattar qarý-jaraqty aqyly túrde tapsyrady. Osy maqsatqa respýblıkalyq bıýdjetten bıyl 95 mln teńgeden astam qarajat bólindi. Qarý-jaraqty óz erkimen tapsyrǵandarǵa onyń tehnıkalyq jaı-kúıine baılanysty ár qarý úshin aılyq eseptik kórsetkishtiń onnan júzge deıingi somasynda tólem kózdelgen», - dedi Nurdildá Oraz mınıstrliktiń baspasóz alańynda ótken dástúrli brıfıng barysynda.
Resmı ókildiń atap ótýinshe, atys qarýyn, oq-dárilerdi, jarylǵysh zattar men qurylǵylardy qabyldaý árbir aýmaqtyq polıtsııa organynda júrgizildi. aktsııa aıasynda polıtsııaǵa myńnan astam turǵyn óz erkimen 1 400 atys qarýyn tapsyrdy.
«Onyń ishinde 1 sholaq avtomat, 197 uzyn uńǵyly qarý, 3 tapansha, 1 myńnan astam tegis uńǵyly, 19 travmatıkalyq qarý, bir keliden joǵary jarylǵysh zattar, sondaı-aq sholaq uńǵyly qarýǵa arnalǵan 57 myń oq-dári qabyldandy», - dedi ol.
