Qazaqstandyqtar óz áleýmettik jaǵdaıyna qanshalyqty qanaǵattanady – monıtorıng

NUR-SULTAN. QazAqparat – Qazaqstan halqy ózderiniń áleýmettik jaǵdaıyna qanshalyqty qanaǵattanady? Qaı óńir turǵyndary azyq-túlik pen basqa taýarlardyń baǵasyna qanaǵattanbaıdy? Osy jáne ózge de áleýmettik saýaldar nátıjesi jóninde QR Prezıdenti janyndaǵy Qazaqstan strategııalyq zertteýler ınstıtýty áleýmettik zertteýler bóliminiń basshysy Janna Kárimova málim etti, dep habarlaıdy QazAqparat tilshisi.

«Áleýmettik zertteý monıtorıngine qatysqan 6800 respondenttiń 60,4 paıyzy qala turǵyndary, qalǵan 39,6 paıyzy aýyl turǵyndary. Ondaǵy áıelderdiń úlesi – 44,6 paıyz, al erlerdiń úlesi – 55,4 paıyz.

Respondentterdiń 65,5 paıyzy taýarlar men azyq-túliktiń baǵasyna, 53,2 paıyzy turatyn jeriniń ekologııalyq ahýalyna, 51,7 paıyzy joldyń sapasyna, 45,6 paıyzy medıtsına sapasyna, 44,7 paıyzy jeke tabys kólemine, 39,9 paıyzy qoǵamdyq kólik qyzmetine, 38,7 paıyzy bilim berýge jáne 34 paıyzy óz jumysyna qanaǵattanarlyqsyz degen baǵa berdi», - dedi Janna Kárimova áleýmettik monıtorıng nátıjesin tanystyra otyryp.

Onyń aıtýynsha, halyqtyń oıyn bilý sharasy 2 baǵytta júrgizildi. Biri azamattardan jeke suhbat alý arqyly, ekinshi joly kóshege shyǵyp halyqtyń pikirin suraý jolymen.

«Eldegi sońǵy 9 aı ishindegi áleýmettik ózgeristerge zer salatyn bolsaq. Barlyq pozıtsııalar boıynsha qanaǵattanbaýshylyqtyń artqany baıqalady. 2021 jyldyń maýsym aıymen salystyrǵanda baǵanyń ósýine qanaǵattanbaý kórsetkishi 4,4 paıyzǵa, medıtsınalyq qyzmet sapasyna qanaǵattanbaýshylyq 7, 5 paıyzǵa, ekologııalyq ahýalǵa qanaǵattanbaý 13,1 paıyzǵa artqan. Monıtorıng nátıjesinde azyq-túlik jáne taýarlardyń baǵasyna ásirese BQO (86,6%), Aqmola oblysy (81,8%) jáne Atyraý oblysynyń (78,9%) jurty alańdatýshylyq tanytty», - deıdi ol.

Buǵan deıin habarlaǵanymyzdaı elimizde halyqtyń áleýmettik jaǵdaıyna monıtorıng jasaldy. Saýalnamany QR Prezıdentiniń janyndaǵy Qazaqstan strategııalyq zertteýler ınstıtýty ótkizdi.

Instıtýt mamandardyń aıtýynsha, áleýmettik saýalnamaǵa 18 jasqa tolǵan, barlyǵy 6800 respondent qatysty.