Qazaqstandyqtar otbasy men balalar týraly ne oılaıdy - saýalnama
NUR-SULTAN. QazAqparat - QR Prezıdenti janyndaǵy Qazaqstannyń strategııalyq zertteýler ınstıtýty qazaqstandyqtar arasynda otbasy jáne balalar týraly júrgizilgen saýalnama qorytyndysyn jarııalady, dep habarlaıdy QazAqparat.
18 jáne odan joǵary jastaǵy qazaqstandyqtardyń áleýmettanýshylyq saýalnamasynyń nátıjelerine sáıkes respondentterdiń 82,3%-y otbasyly adam, ıaǵnı olar jubaıymen birge turady nemese buryn turǵan.
Tıisinshe, úılenbegen jáne boıdaq respondentterdiń úlesi 17,7%-dy qurady. Elimizde saýalnama alynǵandardyń 76,6%-y ata-analar bolyp tabylady, bul rette 58,7%-ynda kámeletke tolmaǵan balalary bar, al respondentterdiń 17,9%-ynda balalary kámeletke tolǵan. Kóbinese otbasynda 2 kámeletke tolmaǵan bala barlar basym (36,9%). Shamamen árbir tórtinshi otbasynda 16 jasqa deıingi bir bala nemese osyndaı úsh bala bar. Respondentterdiń 12,8%-ynda 4 jáne odan da kóp balasy bar, ıaǵnı kóp balaly otbasylar.
Saýalnama barysynda qazaqstandyqtarǵa: «Siz ómirde baqytty otbasyn quryp, jaqsy balalardy tárbıeleı aldyńyz ba?» degen suraq qoıyldy.
Respondentterdiń basym kópshiligi bul suraqqa oń jaýaptar berdi. Qatysýshylardyń 91,8%-y baqytty otbasy týraly oń kózqaras tanytty. Sonymen qatar, olardyń 67,7%-y baqytty otbasyn quryp úlgerdi jáne respondentterdiń 24,1%-y baqytty otbasy qura alatynyna senimdi. Saýalnamaǵa qatysqandardyń 92,7%-y jaqsy balalardy tárbıeleýge oń kózqaraspen qaraıdy. Respondentterdiń 61,0%-nyń pikirinshe, olar jaqsy balalardy tárbıeleı aldy. Taǵy 31,7% óz balalaryn jaqsy tárbıeleı alatynyna senimdi.
