Qazaqstandyqtar nesıege qandaı kásipti jıi ashady
ASTANA. QazAqparat - «Nátıjeli jumyspen qamtý jáne jappaı kásipkerlikti damytý» baǵdaralamasy aıasynda mıllıardtaǵan aqshanyń nesıesi berildi. Sonyń barlyǵy shaǵyn kásipkerlikti damytýǵa jumsaldy, dep xabarlaıdy QazAqparat tilshisi.
QR Ulttyq ekonomka mınıstrliginiń málimetine sáıkes, ótken jyly 2,2 mlrd teńgeniń nesıesin alǵan azamattar saýdamen aınalysyp ketti. Kólik salasyndaǵy jobalarǵa 947 mln teńge berilse, qaıta óńdeýge 741 mln teńgeniń nesıesi bólindi. Al aýyl sharýashylyǵy salasynda berilgen shaǵyn nesıelerdiń kólemi 516 mln teńgeni qurady. Budan bólek, qonaqúıler, asxana jáne taǵy basqa kásipkerlik qyzmetterge 3,6 mlrd teńge jumsaldy.
«Bıyldan bastap shaǵyn nesıelerdiń kólemi boıynsha birqatar ózgerister bar. Atap aıtqanda, Astana, Almaty, Atyraý men Aqtaýda 19 mln-ǵa deıin alýǵa bolady. Ol qalalarda shekteý joq. Basqa qalalar men monoqalalarda 15 mln teńgege deıingi shekti soma bekitiledi. Al shaǵyn qalalar men aýyldy jerlerde 8 mln-nyń nesıesin alýǵa múmkindik bar», - dedi kásipkerlikti damytý departamenti basshysynyń orynbasary Shyńǵys Axmetov búgin Úkimet úıinde ótken baspasóz máslıxatynda.
Aıta keteıik, QR Prezıdenti Nursultan Nazarbaevtyń bes áleýmettik bastamasynda shaǵyn nesıelendirýdi keńeıtý mindeti qoıylǵan bolatyn. Atap aıtqanda, Memleket basshysy shaǵyn nesıelerge qosymsha 20 mlrd teńge bólýdi tapsyrdy.
«Osylaısha, shaǵyn nesıelendirý kólemi 62 mıllıard teńgege jetetin bolady. Ásirese, aýyldy jerlerde. Jalpy, aýylda ǵana emes, barlyq jerde adamdar óz bıznesin asha alady. Sonyń arqasynda shaǵyn nesıelendirýdiń kólemi 14 myń adamdy qamtıtyn bolady. Bul ótken jylmen salystyrǵanda eki esege artyq. 14 myń adam ol az emes. Sebebi bir adamnyń qaramaǵynda úsh-tórt, on, bálkim, elý adam jumys isteıtin bolady. Bunyń barlyǵyn qosqanda myqty shaǵyn bıznes shyǵady. Soǵan qoldaý jasaýymyz qajet», - dedi N.Nazarbaev Parlament palatalarynyń birlesken otyrysynda.
Shaǵyn nesıeler jumyssyzdar men ózin-ózi jumyspen qamtyp júrgenderge beriledi. Alaıda ózin-ózi jumyspen qamtyp júrgen azamattar úshin bir shekteý bar.
