Qazaqstandyqtar mýzeılerge kóbirek baratyn bolǵan
NUR-SULTAN. QazAqparat - Qazaqstan mýzeılerinde qyzmet kórsetý kólemi 25 paıyzǵa artyp, 10 mlrd teńgege jetken. Bul týraly QazAqparat Ranking.kz silteme jasap habarlaıdy.
Portaldyń habarlaýynsha, byltyr eldegi mýzeıler 10 mlrd teńgege qyzmet kórsetken. 2017 jyly bul kórsetkish 8,1 mlrd teńgeniń kóleminde bolǵan eken. Atalmysh kezeńde saladaǵy ósim kórsetkishi 1,4 paıyz bolsa, byltyr 24,4 paıyzǵa jetken.
«42 jyl buryn Halyqaralyq mýzeıler keńesi 18 mamyrdy Halyqaralyq mýzeı kúni dep belgiledi. Bul kúndi álemniń 149 memleketimen birge bizdiń el de turaqty atap ótip keledi. Osy kún aıasynda «Mýzeıdegi tún», «Mýzeıdegi kún» sııaqty sharalar uıymdastyrylyp jalpy halyqtyń mýzeıge nazary kóbirek aýa bastady»,- delingen portaldyń aqparatynda.
Jyl ishinde elimizde 5 mýzeı jańadan ashylyp, jalpy sany 245-ke jetken. Mýzeıi kóp óńirlerdiń kóshin 28 murajaıy bar Almaty oblysy bastap tur.
Ekinshi orynda 27 mýzeıi bar Túrkistan oblysy, úshinshi oryndy 20 mýzeıi bar Aqtóbe oblysy ıelengen.
2018 jyly mýzeıge kelýshilermen qatar eksponattar sany artqan. Jalpy ósim 1,8 paıyzdy qurap, 2,5 mıllıonǵa jetken.
Ranking.kz-tiń málimetine súıensek, eksponattardyń elektrondyq nusqasyn kóshirý jumysy da jandanǵan. Bir jyldyń ishinde elektrondyq jádigerler sany 14,1 paıyzǵa artyp, 837,4 myńǵa jetken.
