Qazaqstandyqtar meni saılaı otyryp, úlken senim artty - N. Nazarbaev
ASTANA. 8 sáýir. QazAqparat /Aıdar Ospanalıev/ - «Qazaqstandyqtar meni saılaı otyryp, maǵan úlken senim artyp otyr.
Men úshin álemde teńdesi joq kópultty eldiń Elbasy mıssııasyn jalǵastyra otyryp, Qazaqstan Táýelsizdiginiń 20 jyldyǵynda osy eldiń búkil halyq saılaǵan Prezıdenti bolý úlken mártebe»,- dedi búgin Astanadaǵy Táýelsizdik saraıynda ótken ulyqtaý rásiminde Qazaqstan halqyna Ant berip, jańa prezıdenttik merzimge qaıta kiriskennen keıin sóılegen sózinde QR Prezıdenti Nursultan Nazarbaev.
«Osy saılaýda maǵan senip, shyn máninde ózderiniń qoldaýlaryn kórsetken azamattarǵa rızashylyǵymdy bildiremin. Bul bizdiń Qazaqstan sııaqty sátimen damyp otyrǵan memleketti qurý jolyndaǵy ortaq eńbegimizdiń eń joǵary baǵasy. Men elimizdiń shyn dosy bolyp tabylatyn álemniń barlyq aımaǵyndaǵy elderge alǵysymdy bildiremin», - dedi Memleket basshysy.
Sondaı-aq Prezıdent sózinde Reseı, Qytaı elderiniń jáne TMD-ǵa múshe memleketterdiń jáne Eýropalyq Odaq elderi men ózge de birqatar memleketterdiń basshylarynan quttyqtaý alǵandyǵyn aıtty. «Mundaı quttyqtaýlar áli de bolsa kelip túsýde. Men olardyń barlyǵyna da rızamyn. Óıtkeni bul tek qazaqstandyqtardyń qalaýyna ǵana emes, bizdiń strategııalyq baǵytymyzǵa kórsetilgen shyn mánindegi qoldaý. Quttyqtaýlar elimizdiń de túkpir-túkpirinen kelip jatyr. Men ózimniń otandastaryma jyly lebizderi men aq kóńilderi úshin alǵys aıtamyn. Olar maǵan ne tilese, men de olarǵa sony tileımin»,-dedi N.Nazarbaev.
