Qazaqstandyqtar memlekettiń senimdi qamqorlyǵynda ekenine kezekti ret kóz jetkize aldy - Elbasy poshtasynan
ASTANA. 22 maýsym. QazAqparat - Memleket basshysy Nursultan Nazarbaevtyń atyna Qazaqstannyń týrıstik qaýymdastyǵynyń prezıdenti R.Asanbaevadan hat keldi.
Bul týraly Aqordanyń baspasóz qyzmetinen málim etti.
Óz hatynda R.Asanbaeva túrik avıakompanııasynyń bankrotqa ushyraýy saldarynan zardap shekken qazaqstandyq týrısterge kórsetilgen qamqorlyq úshin alǵysyn bildirgen. Osy sebepten otandyq týrıstik fırmalar da qıyn jaǵdaıǵa tap bolǵan bolatyn, onyń kópshiligi - shaǵyn jáne orta bıznes sýbektileri.
«Sizdiń tapsyrmańyzben otandastarymyzdy elge qaıtarý úshin Tótenshe jaǵdaılar mınıstrliginiń ushaqtaryn bólý jáne jedel, tótenshe kómek kórsetý týraly Qazaqstan azamattary men týrıstik qoǵamdastyq úshin mańyzdy sheshim qabyldandy», - delingen hatta.
Hat ıesi memleket tarapynan kórsetilgen kómek 800-den astam qazaqstandyq týrıstik fırmanyń ornyqty jumysyn saqtap qalýǵa múmkindik jasaǵanyn, eger bankrottyq oryn alǵan jaǵdaıda 4 myńǵa jýyq adam jumyssyz qalýy múmkin bolǵanyn atap ótken.
«Sizdiń sheshimińiz Otanymyzdyń kúsh-qýatyn jáne qarapaıym azamattar, barsha qazaqstandyqtar memlekettiń senimdi qamqorlyǵynda ekenine, eshqashan qorǵaýsyz qalmaıtynyna, olarǵa árqashan kómek kórsetiletine senimdilikti kórsetti», - dep jazady R.Asanbaeva.
