Qazaqstandyqtar memlekettik qyzmet sapasyna qanshalyqty kóńili tolady

NUR-SULTAN. QazAqparat – Qazaqstandyqtar memlekettik qyzmet kórsetý sapasyna rıza ma? Qyzmet kórsetýde qandaı quqyqbuzýshylyqtar oryn alyp jatady? Osy jáne ózge de memlekettik qyzmet sapasyna qatysty máselelerge QR Memlekettik qyzmet isteri agenttiginiń tóraǵasy Darhan Jazyqbaev toqtalyp ótti, dep habarlaıdy QazAqparat tilshisi.

«Agenttik jumysynyń mańyzdy baǵyttarynyń biri halyqqa sapaly memlekettik qyzmet kórsetý. Bul baǵytta aýqymdy jumys atqaryldy dep aıtýǵa bolady. Sebebi baqylaý fýnktsııalaryn iske asyrý aıasynda 2021 jyly respýblıka boıynsha barlyǵy 782 tekserý júrgizildi. Onyń nátıjesinde memlekettik qyzmet kórsetý salasynda 24 myńnan astam quqyq buzýshylyq anyqtaldy. Zań buzýshylyqtyń basym bóligi memlekettik qyzmet kórsetýdiń merzimine baılanysty. Tekseris qorytyndysyna saı 229 tulǵa ákimshilik jaýapkershilikke tartyldy», - dedi Darhan Jazyqbaev agenttiginiń keńeıtilgen alqa otyrysynda.

Onyń aıtýynsha, 2021 jyly memlekettik qyzmet kórsetý sapasyna qatysty halyqtan 716 ótinish kelip tústi.

«Turǵyndardan kelip túsken ótinishterdiń negizinde 359 jospardan tys tekseris júrgizildi. Tekserý barysynda 160 ótinish ıesiniń shaǵymy rastaldy. Memlekettik qyzmet kórsetý salasynda quqyq buzýshylyqtyń aldyn alý maqsatynda bizdiń agenttiktiń janynda depýtattar, quzyrly organ mamandary, úkimettik emes uıym ókilderinen quralǵan konsýltatıvtik saraptamalyq top jumys isteıdi. Ótken jyly atalǵan jumys tobynyń 3 otyrysy ótti. Otyrys nátıjesinde memlekettik qyzmetterdiń sapasyn arttyrý boıynsha usynystar ázirlendi», - deıdi ol.

Sondaı-aq, agenttik tóraǵasy memlekettik qyzmetti kórsetýdiń sapasyna qatysty halyq pikiri eskerilgenin aıtty.

«Ótken jyly Prezıdent ákimshiliginiń tapsyrmasyna sáıkes, elektrondy Úkimet portaly arqyly memlekettik qyzmetti kórsetý sapasyna qoǵamdyq baqylaý monıtorıngi júrgizildi. Monıtorıng 95 memlekettik qyzmet boıynsha 23 myńnan astam respondenttiń qatysýymen ótti. Nátıjesinde halyqtyń memlekettik qyzmet kórsetý sapasyna qanaǵattaný deńgeıi 75 paıyzdy qurady. Bul obektıvti qamtamasyz etýge múmkindik beretindikten agentti sharany bıyl da jalǵastyrady», - deıdi D. Jazyqbaev.