Qazaqstandyqtar mekenjaı boıynsha HQO-ǵa barmaı-aq tirkele alady

ASTANA. QazAqparat - Qazaqstandyqtar budan bylaı Halyqqa qyzmet kórsetý ortalyqtaryna (HQO) barmaı-aq, mekenjaı boıynsha onlaın tirkele alady, dep habarlaıdy «QazAqparat» HAA tilshisi «Ulttyq aqparattyq tehnologııalar» AQ Basqarma tóraǵasy Áset Turysovqa silteme jasap.

«25 aqpannan bastap «Qazaqstan Respýblıkasy azamattarynyń turǵylyqty mekenjaıy boıynsha tirkelýi» qyzmetin avtomattandyrdyq. Eger buryn azamat mekenjaı boıynsha tirkelý úshin elektrondyq tsıfrlyq qoltańbamen birge (ETsQ) ótinishti toltyryp, budan keıin qolǵa túsken qujatty «Azamattarǵa arnalǵan úkimet» memlekettik korporatsııasynyń HQO-syna aparatyn. Osylaısha, jańa mekenjaı jeke kýáliktiń chıpine túsip, atalǵan málimet QR ІІM-niń bazasyna engiziletin. Biraq, osydan bastap, ótinish Egov.kz portalyna túskennen keıin qoldanýshy HQO-ǵa barmaıtyn boldy. Sebebi, atalǵan málimet birden QR ІІM-niń bazasynda jańartylady», - dedi A.Turysov Feısbýktegi paraqshasynda.

Onyń aıtýynsha, kez kelgen qoldanýshy bul jumystyń nátıjesin 15 mınýttyń ishinde teksere alady. Ol úshin portaldaǵy «Mekenjaılyq málimetterdi tekserý» nemese «Mekenjaı anyqtamasyn alý» qyzmetin paıdalaný kerek.