Qazaqstandyqtar medsaqtandyrý týraly telegram-bot arqyly bile alady

ALMATY. QazAqparat – Qazaqstanda SaqtandyryBot atty jańa telegram-kanal iske qosyldy. Onyń kómegimen saqtandyrý mártebesi týraly bilýge bolady, dep habarlaıdy QazAqparat tilshisi.

«Jaqynda Medıtsınalyq saqtandyrý qory telegramda SaqtandyryBot kanalyn iske qosty. Onyń kómegimen kez kelgen azamat JSN nómirin engizý arqyly saqtandyrý mártebesin bile alady», - dedi MÁMS úılestirý departamentiniń dırektory Azamat Ómirtaev.
Budan bólek, óz mártebeńdi medıtsınalyq saqtandyrý júıesinen tekserýge bolady: JSN nómiri arqyly www.egov.kz saıtynda nemese aýmaqtyq HQKO-larǵa barý arqyly bilýge múmkindik bar.
Sondaı-aq, ol saqtandyrylǵan mártebesi berilgen árbir azamattyń MÁM paketinde medıtsınalyq qyzmetterdi paıdalanýǵa múmkindik beriletinin túsindirdi.
Budan bólek, Azamat Ómirtaev jeńildik berilgen 15 topqa kiretin azamattarǵa memleket qarjy bóletindikten, olar avtomatty túrde MÁMS qatysýshysy bolatynyn aıtty.
«Jeńildik berilgen 15 topqa 10,6 mln nemese turǵyndardyń 57% kiredi. Bular – balalar, múgedekter, stýdentter, úsh jasqa deıingi bala tárbıelep otyrǵandar, bala kúninen múgedekter tárbıelep otyrǵandar, kópbalaly analar», - dedi ol.
Mindetti áleýmettik medıtsınalyq saqtandyrý júıesi (MÁMS) emhana men dárigerdi óz betinshe tańdaýǵa, sonymen qatar Áleýmettik medıtsınalyq saqtandyrý qorymen kelisim jasaǵan jeke medıtsınalyq uıymdarǵa saqtandyrý úshin júginýge múmkindik beredi.