Qazaqstandyqtar medıtsınalyq apparattardan tegin óte alady
«№6 qalalyq emhanada 90 404 adam tirkelgen. Bizdiń negizgi mindetimiz - alǵashqy medıko-sanıtarlyq kómek, balalarǵa mamandandyrylǵan medıtsınalyq kómek, eresekterge arnalǵan mamandandarylǵan medıtsınalyq kómek kórsetý. MÁMS aıasynda bizdiń múmkindigimiz keńeıe tústi. Qosymsha qarjylandyrylǵandyqtan, bizge emdelýge kelgen naýqas basqa emhanaǵa barmaı-aq barlyq medıtsınalyq qyzmet túrlerin ala alady», - deıdi emhananyń bas dárigeri Dınara Baıserkına bastapqy deńgeıde medıtsınalyq kómek kórsetetin densaýlyq saqtaý uıymdary boıynsha ótken baspasóz týrynda.
Sondaı-aq, ol emhanada kompıýterlik tomografııa bar ekenin, eresekterge jáne balalarǵa arnalǵan ońaltý ortalyqtary ashylǵanyn aıtty.
«1 qańtardan bastap MÁMS-ke baılanysty medıtsına salasynda óte úlken ózgerister bolyp jatyr. Ásirese ońaltý boıynsha úlken jumystar júrgizilýde. Bizde 12 tósektik ońaltý jumystaryna arnalǵan qosymsha ashyldy. Ol medıtsınalyq qurylǵylarmen tolyq qamtamasyz etildi. Oǵan úlken qarajat bólinýde. Buryn kompıýterlik tomografııa (KT) men magnıtti rezonansty tomografııa (MRT) tek áleýmettik quramǵa kiretin naýqastar óte alsa, qazir medıtsınalyq saqtandyrylǵan kez kelgen naýqas tegin túrde óte alady», -deıdi №6 emhananyń emdeý isi boıynsha bas dárigeriniń orynbasary Erjan Qalıev.
Sonymen qatar, ol ortalyq ambýlatorııalyq hırýrgııa damyp kele jatqanyn aıtty.
«Buryn teń qana statsıonarda istelinetin otalar qazirgi ýaqytta emhana ishinde de istele beredi. Bul da úlken jetistik. Sondaı-aq, tegin beriletin 640 dári-dármektiń 404 túri MÁMS aıasynda beriledi», - deıdi ol.
