Qazaqstandyqtar maýsym aıynda tarıhta bolmaǵan kólemde kredıt aldy

ASTANA. QazAqparat - Maýsym aıyndaǵy nesıe alý statıstıkasy belgili boldy. Birinshi kredıt bıýrosy aıdyń qorytyndysyn shyǵardy, dep habarlaıdy QazAqparat.

Jeke tulǵalarǵa berilgen nesıeniń jalpy kólemi 1,2 trln teńgeden asty. Bul - tarıhı maksımým.

Berilgen tutynýshylyq kepilsiz kredıt kólemi 800 mlrd teńgeden asty. Bul da rekord.

Osy kredıtterdiń 56 paıyzy kredıt alǵandardyń 10 paıyzyna (207 myń adam) tıesili.

Jalpy alǵanda, klıentterdiń bul sanaty 448,1 mlrd teńgege jańa kredıt aldy. Árqaısysy - 880 myńnan 38 mln teńgege deıin.

Nesıe alýshylardyń kóbi áldeqaıda az somany qanaǵat etedi - jartysy 140 myń teńgeden aspaıtyn kredıt alǵan. Maýsym aıynda tutynýshylyq kepilsiz nesıeni shamamen 2,1 mln adam resimdedi.

Berilgen avtokredıt kólemi - 130 mlrd teńgeden astam. Mundaı buryn bolǵan emes.

Bir aıda shamamen 2,5 mln adam jańa nesıe aldy. Budan sál kóbirek kórsetkish 2022 jyldyń qarashasynda tirkelgen.

Al berilgen ıpotekalyq qaryzdyń ortasha kólemi birshama azaıǵan. Maýsym aıynda ol 15,4 mln teńgeni qurady.

Bul - jalpy jyljymaıtyn múlik naryǵyndaǵy dınamıkany kórsetetin bir jyldaǵy eń tómengi mán.

Bir qyzyǵy, erlerge qaraǵanda áıelder nesıeni uqyppen ýaqytynda tóleıdi. 90 jáne odan da kóp kún keshikken kredıtterdiń úlesi áıelderde - 8,3%, erlerde - 12,7%.