Qazaqstandyqtar Máskeýdegi kásipqoı boks keshin tikeleı efırden kóre alady

NUR-SULTAN. QazAqparat - «Qazsport» telearnasy 20 naýryzda Máskeýde ótetin kásipqoı boks keshin tikeleı efırde kórsetedi, dep habarlaıdy QazAqparat tilshisi.

Basty jekpe-jekte jartylaı aýyr salmaqtaǵy WBC jáne IBF tujyrymdary boıynsha álem chempıony, reseılik Artýr Beterbıev (15-0-0, 15 KO) pen úmitker, nemis boksshysy Adam Daınes (19-1-1, 10 KO) kezdesedi.

15 jekpe-jektiń barlyǵyn nokaýtpen utqan Beterbıev sharshy alańǵa uzaq úzilisten keıin oralyp otyr. Reseılik boksshy sońǵy ret 2019 jyldyń qazan aıynda judyryqtasyp, ýkraınalyq Aleksandr Gvozdıkti tehnıkalyq nokaýtpen jeńgen bolatyn.

Al Adam Daınes 2019 jyldyń jazynda qytaı boksshysy Fanlýng Mengke ese jiberip, karerasynda alǵash ret jeńiliske ushyrady.

Kásipqoı boks keshi «Qazsport» telearnasynda tikeleı efırde 20 naýryz 23:00-de (Nur-Sultan ýaqytymen) bastalady.