NUR-SULTAN. QazAqparat - 2020 jyldan bastap Qazaqstan qalalarynyń ákimdikteri LED-ekrandarǵa aýanyń sapasy týraly aqparattardy jarııalap otyrady.
Bul týraly búgin QR Ekologııa, geologııa jáne tabıǵı resýrstar mınıstri Maǵzum Myrzaǵalıev aıtty, dep habarlaıdy QazAqparat tilshisi.
«Jyl saıyn qorshaǵan ortanyń jaı-kúıi men tabıǵı resýrstardy paıdalaný, lastaýshylardyń shyǵaryndylary men tasymalynyń memlekettik tirkelimin qurý týraly ulttyq baıandama jarııalaý qarastyrylǵan. Qoǵamdyq tyńdaýǵa shyǵarylýǵa jatatyn jobalardyń sharýashylyq qyzmet túrleriniń tizimi anyqtalǵan», - dedi mınıstr QR Prezıdenti janyndaǵy Adam quqyqtary jónindegi komıssııa otyrysynda.
Onyń atap ótýinshe, qazirgi ýaqytta iri tabıǵat paıdalanýshylardyń esep berýi bar. Biraq olar qaǵaz túrinde ǵana usynylady.
«Biz málimetterdi usyný protsesin avtomattandyrýdy josparlap otyrmyz. Qazirgi ýaqytta Elbasynyń tapsyrmasyna sáıkes, mınıstrlik jergilikti atqarýshy organdarmen birge aýany lastaýshy zattardyń kontsentratsııasynyń negizgi kórsetkishterin ekranǵa ornalastyrý, telearnalardy júgirtpe joldar men ákimdikterdiń saıttarynda aqparattar ornalastyrý arqyly halyqty qulaqtandyrý jolymen aýa atmosferasynyń sapasy týraly aqparattardy jurtshylyqqa onlaın-jetkizýdi keńeıtý jumystaryn jalǵastyryp jatyr. 2018 jyly »Qazgıdromet« RMK Qazaqstannyń 46 eldi mekeninde 8 lastaýshy zat boıynsha aýa atmosferasynyń sapasyn qadaǵalap otyrýǵa múmkindik beretin mobıldi qosymshany iske qosty. Qazirgi ýaqytta Pavlodar, Ekibastuz, Petropavl, Oral jáne Aqtaý qalalarynyń ákimdigi mobıldi qosymsha arqyly LED-ekrandarda aýa atmosferasyndaǵy lastaýshy zattardyń kontsentratsııasy týraly málimetterdi kórsetip turady. Qalǵan ákimdikter kelesi jyldan bastap aýanyń jaı-kúıi týraly aqparattardy LED-ekrandarda ornalastyrýdy josparlap otyr», - dedi Maǵzum Myrzaǵalıev.
