Qazaqstandyqtar qyzyl túsken boıalǵan Aıdy kóredi
ASTANA. QazAqparat - Shildeniń 27-sinen 28-ine qaraǵan túni Qazaqstannyń barlyq jáne Reseıdiń kóp bóliginiń turǵyndary sırek kezdesetin, biraq óte qyzyq jáne ózgeshe astronomııalyq qubylysty tamashalaı alady, dep habarlaıdy QazAqparat tilshisi.
Osy túni tolǵan Aı óz orbıtasynda batystan shyǵysqa jyljı otyryp, Jerdiń kóleńkesine kiredi. Bylaısha aıtqanda, Aıda tolyqtaı Kún tutylady: Jer Kún men Aıǵa túsetin jaryqty birneshe saǵatqa jabady. Bul týraly QazAqparatqa V.G.Fesenkov atyndaǵy Astrofızıka ınstıtýty Aı fızıkasy men ǵalamshar zerthanasynyń jetekshisi, professor, fızıka-matematıka ǵylymdarynyń doktory VıktorTeıfel aıtty.
«Bizder - jerdegiler úshin Jerdiń jartylaı kóleńkesine kiretin Aı, aldymen, jáılap kózden ǵaıyp bola bastaıdy. Keıin Aıdyń dıskisin planetamyzdyń qara kóleńkesi birtindep jaba bastaıdy. Budan soń Aı tolyqtaı Jerdiń kóleńkesine enedi. Eń qyzyqty qubylys osy kezde bolady. Aı tolyǵymen joǵalyp ketpeı, qoıý qyzyl nemese qyzǵylt túske boıalyp, kórinip turady. Bul tús túrli tutylý kezinde ártúrli bolyp ózgerýi múmkin», - dep túsindirdi professor Teıfel.
27 shilde kúni Aı jerdiń kúńgirt kóleńkesine Astana jáne Almaty ýaqyttary boıynsha 23 saǵat 13 mınýtta kire bastaıdy. Aıdyń dıskisi jer kóleńkesiniń shetine 00 saǵat 24 mınýtta sáıkes keledi. Aı jerdiń kóleńkesine 01 saǵat 30 mınýtta tolyqtaı kiredi. Tolyq tutylý 03 saǵat 13 mınýtta aıaqtalady. Aı 04 saǵat 19 mınýtta kóleńkeden shyǵady.
Vıktor Teıfel Aı nemese Kún tutylýynyń adamdarǵa esh keri áseri tımeıtindigin atap ótti.
