Qazaqstandyqtar qyzmet kórsetý oryndarǵa QR-kodpen ǵana kire alady

NUR-SULTAN. QazAqparat - QR Tsıfrlyq damý, ınnovatsııalar jáne aeroǵarysh ónerkásibi mınıstrligi men Densaýlyq saqtaý mınıstrligi birlesip, eldegi epıdemıologııalyq jaǵdaı boıynsha derekterdi baqylaý jáne taldaý maqsatynda «Ashyq» qosymshasyn ázirledi, dep habarlaıdy QazAqparat tilshisi.

«QR TsDIAÓM, QR DSM «Atameken» ulttyq kásipkerler palatasymen birlesip, karantın sharalary kezeńinde qyzmeti shektelgen (spa-ortalyqtar, fıtnes ortalyqtar, kınoteatrlar) bıznes ókilderi arasynda pılottyq jobasyn júrgizip jatyr. Endi, osy oryndarǵa barý úshin arnaıy QR-kodty skanerlep, kireberiste kórsetý qajet. Baǵdarlama óz kezeginde qyzyl, sary, kók jáne jasyl mártebelerge bólinetin táýekel dárejesin kórsetedi», - delingen mınıstrlik aqparatynda

Qyzyl mártebe qozǵalysty shekteýdi, ambýlatorııalyq baqylaýdaǵy adamdar úshin úıdi oqshaýlaýdyń qatań rejımin saqtaýdy bildiredi.

Sary – qozǵalysty ishinara shekteý – paıdalanýshy PTR derekter qorynda baılanysta bolǵan retinde kórsetilgen: patsıent úıden oqshaýlaý rejımin saqtaıtyn jerden 500 metrden aspaıtyn azyq-túlik jáne sharýashylyq dúkenderge, dárihanalarǵa barýǵa ruqsat etiledi.

Kók – PTR mindetti bolatyn oryndardan basqa (mysaly, áýejaıda) qozǵalysqa eshqandaı shekteýler joq.

Jasyl mártebe qozǵalysta eshqandaı shekteýler joq ekenin bildiredi. Bul paıdalanýshy derekter qorynda COVID-19 teris nátıjesi bar PTR-testileýden ótken adam retinde kórsetilgen.

Bul mártebelerdi kórsetý bızneske óz qyzmetin jalǵastyrýǵa jáne kelýshilerge qaýip tóndirmeýge múmkindik beredi. Kelýshilerde smartfon bolmaǵan jaǵdaıda qosymshada úı-jaıǵa kirýdi baqylaıtyn qyzmetkerlerge arnalǵan fýnktsııa bar. Olar kelýshiniń mártebesin JSN nemese jeke kýálikte ornalasqan shtrıh-kodty skanerleý arqyly teksere alady.

Ótkizilgen pılottyq joba qoǵamdyq oryndarǵa (SOO, dúkender, meıramhanalar, dámhanalar, vokzaldar, áýejaılar jáne t.b.) kirý úshin Qazaqstan Respýblıkasynyń barlyq aýmaǵy boıynsha «Ashyq» mobıldi qosymshasyn taralymyn kóbeıtý merzimin odan ári anyqtaýǵa múmkindik beredi.

Aǵymdaǵy kezeńde «Ashyq» mobıldi qosymshasy App Store jáne Play Market-ten júkteý úshin qoljetimdi.