Qazaqstandyqtar Qytaı áýe kompanııasynyń servısine shaǵymdandy
BEIJІŃ. QazAqparat - 11 qańtar kúni Sıngapýrdan Beıjińge Air China áýe kompanııasynyń № SA976 tranzıttik reısimen jetken 23 qazaqstandyq azamat qolaısyz aýa raıyna baılanysty Astanaǵa óz ýaqytynda usha almady, dep habarlaıdy «QazAqparat» HAA-nyń Qytaıdaǵy menshikti tilshisi.
Qazaqstan Respýblıkasynyń QHR-daǵy Elshiliginiń málimetterine qaraǵanda, qytaılyq shekarashylar qazaqstandyqtardy tranzıttik aımaqtan shyǵarýdan bas tartqan. Qazaqstandyq dıplomattardyń kepildik hat jazý usynysy da nátıjesiz boldy.
Sonyń saldarynan arasynda 3-12 jastardaǵy 7-8 bala bar Qazaqstan azamattary Beıjiń áýejaıyndaǵy úshinshi termınaldyń tranzıttik aımaǵynda 20 saǵattan astam ýaqyt boıy qalyp qoıdy. Olar Beıjińnen Astanaǵa Máskeý arqyly 12 qańtarda ǵana ushyp ketken.
Air China áýe kompanııasy qyzmetkerleri kórsetken qyzmeti qazaqstandyqtardyń qatty ashýyn keltirdi. Olar jolaýshylardy qajetti ómir súrý jabdyqtarymen, tamaqpen jetkilikti qamtamasyz etpegen. Sýyq tamaq berilgen, sýsyn jetkiliksiz bolǵan, t.b. Budan tys, olar Qazaqstan azamattaryna mensinbeı qaraǵan, al Reseı, AQSh jáne Eýropa elderiniń azamattary termınaldan shyǵarylyp, qonaqúıge ornalasqan.
Aıta keteıik, Qazaqstan Respýblıkasynyń QHR-daǵy Elshiligi Qytaı Syrtqy ister mınıstrligine tıisti nota daıyndap qoıdy.
