Qazaqstandyqtar qyrkúıek aıynyń úzdik sportshysyn tańdap jatyr
NUR-SULTAN. QazAqparat – QR Ulttyq Olımpıadalyq komıteti qyrkúıek aıynyń eń úzdik sportshysyn anyqtaýǵa kiristi, dep habarlaıdy QazAqparat.
«Qyrkúıek aıy iri sporttyq básekelerge toly boldy. Ásirese, qazaqstandyq jankúıerler asyǵa kútken boks pen kúres túrlerinen Álem chempıonattarynyń áseri erekshe. Otandyq sportshylar álemdik jarystarda namysqa tyrysyp, elimizdiń kók baıraǵyn jelbiretti. Ánuranymyz shyrqalyp, abyroıymyz artty. Osy oraıda, Olympic.kz aıdyń úzdik sportshysyn anyqtaýǵa kiristi», - delingen komıtettiń resmı saıtynda.
Aıta keteıik, elimizdiń úzdik sportshylary sońǵy birneshe aıda anyqtalyp keledi.
Qazaqstandyqtarǵa daýys berý úshin qyrkúıek aıynda zor tabysqa jetken sportshylardyń tizimi usynylyp otyr. Daýysty Olympic.kz saıtynyń basty betinde qaldyrýǵa bolady. Aıaqtalatyn ýaqyty - 9 qazan, saǵat 13:00.
Bekzat Nurdáýletov, boks
Reseı jerinde ótken bokstan Álem chempıonaty qazaq eline jańa juldyz syılady. 81 kelide judyryqtasqan Bekzat Nurdáýletov óz salmaǵynda qarsylas shydatpaı, jeńiske jetti. Álemdik synda alty kezdesý ótkizip, barlyǵynan basym túsken Bekzat kópshiliktiń súıikti sportshysyna aınalyp úlgerdi. Ol álem birinshiliginde basqany emes, áıgili kýbalyq boksshy, tórt dúrkin álem chempıony, Olımpıada oıyndarynyń jeńimpazy Hýlıo Sezar La Krýzdy jeńip, kózge tústi. Odan bólek, birinshilik barysynda tórt nokdaýn tirkedi. Fınalda ózbekstandyq Dilshodbek Rýzmetovti taza jeńgen Nurdáýletov aıdyń úzdik sportshysy atanýdan úmitti.
Qamshybek Qońqabaev, boks
Bokstan Qazaqstan komandasynyń kapıtany da Álem chempıonatynan qur qaıtqan joq. Qamshybek Qońqabaev asa aýyr salmaqta fınalǵa jetip, aqtyq synda ózbekstandyq Bahadúr Jalolovtan utyldy. Qamshybekke qarsylasynyń salmaǵy áldeqaıda aýyr, boıy bıik bolǵany yńǵaısyzdyq týdyrǵany ras. Degenmen, qazaq boksshysy aıanyp qalǵan joq. Óz salmaǵynda áýesqoı bokstaǵy úzdikterdiń biri ekenin taǵy da dáleldedi.
Dáýlet Nııazbekov, erkin kúres
Nur-Sultan tórin dúbirge bólegen kúres túrlerinen Álem chempıonatynda qazaq balýandary úlken erlik kórsetti. Álemdik dodada aqtyq synǵa deıin súrinbeı, azýly qarsylastarynan basym túsken balýandardyń biri – Dáýlet Nııazbekov. Dáýlet Álem chempıonatynyń «kúmisin» ıelenip qana qoımaı, 65 keli salmaq dárejesinde 2020 jylǵy Tokıo Olımpıadasyna lıtsenzııa jeńip aldy. Al jartylaı fınalda álemniń úzdik balýandarynyń biri, úndistandyq Badjrang Pýnııany jeńdi.
Nurǵoja Qaıpanov, erkin kúres
Jastar komandasynan jaqynda aýysyp, eresekter arasyndaǵy alǵashqy álem chempıonatynda fınalǵa jetken Nurǵoja Qaıpanov kópshiliktiń súıikti sportshysyna aınalyp úlgerdi. Mamandar elorda tórinde atoı salǵan Qaıpanovtyń bolashaǵynan zor úmit kútip otyr. Nurǵoja Nur-Sultandaǵy álem chempıonatynda tek reseılik Davıd Baevqa jol berdi. Degenmen, Qaıpanovtyń kúresi kóp jankúıerdiń kóńilinen shyqqany anyq.
Horlan Jaqansha, grek-rım kúresi
Grek-rım kúresinen Qazaqstan komandasynyń múshesi Horlan Jaqansha da álem birinshiligine alǵash ret qatysqan balýan. «Klassıkter» dodasynda eshkimnen taısalmaı, ázirbaıjandyq chempıon Azızlıdi de altynnan qaqty. Biraq fınalda asyǵystyq tanytyp, grýzııalyq qarsylasyna ese jiberdi. Horlannyń kúmis medali qazaqstandyq grek-rım kúresi sheberleri utyp alǵan eń joǵarǵy júlde.
Igor Son, aýyr atletıka
Taılandtyń Pattaııa qalasynda ótip jatqan álem chempıonatynda Igor Son kúmis júldeger atandy. Ol Qazaqstan qorjynyndaǵy jalǵyz medaldi jeńip alǵan ziltemirshi. 55 keli salmaqta synǵa túsken Son qossaıys qorytyndysy boıynsha 266 kelini (120+146) baǵyndyrdy.
