Qazaqstandyqtar qyrkúıek aıynyń úzdik sportshysyn tańdady
NUR-SULTAN. QazAqparat – Qazaqstan Ulttyq Olımpıadalyq komıtetiniń resmı saıtynda «Qyrkúıek aıynyń eń úzdik sportshysyna» daýys berý aıaqtaldy, dep habarlaıdy QazAqparat.
Buǵan deıin habarlaǵanymyzdaı, qyrkúıek aıynyń úzdigi atanýǵa 6 sportshy úmitker boldy. Olar: Bekzad Nurdáýletov (boks), Qamshybek Qońqabaev (boks), Nurqoja Qaıpanov (erkin kúres), Dáýlet Nııazbekov (erkin kúres), Igor Son (aýyr atletıka) jáne Horlan Jaqansha (grek-rım kúresi).
Olympic.kz saıtynda 1 qyrkúıek kúni bastalǵan daýys berý 9 qazanda aıaqtaldy. Nátıjesinde, 43,07 paıyzben Bekzat Nurdáýletov top jardy. 23,34 paıyzben Horlan Jaqansha ekinshi orynǵa jaıǵassa, 22,08 daýys jınaǵan Nurqoja Qaıpanov úshinshi orynǵa ıe boldy.
