Qazaqstandyqtar qujattaǵy qateni bir-aq kúnde túzete alady
ASTANA. QazAqparat - Qazaqstandyqtar qaǵaz qujattardaǵy jeke málimetter sáıkessizdigin bir kún ishinde túzete alady, dep habarlaıdy QazAqparat tilshisi.
Almaty qalalyq ádilet departamentiniń málimetinshe, qazirgi ýaqytta «E-muraǵat AHAJ» ortalyq serverinde 50 mıllıonnan astam skanerlengen jáne atrıbýttalǵan akt jazbalary bar.
«2018 jyldyń 1 maýsymynan bastap 2008 jylǵa deıin tirkelgen muraǵattyq akt jazbalaryna túzetý engizýge múmkindik berý úshin «AHAJ» aqparattyq júıesin ashý josparlanyp otyr. Osyǵan baılanysty, «AHAJ» aqparattyq júıesimen ykpaldastyrylǵan aqparattyq júıelerde qate málimetter bolýy múmkin»,- dep atap ótti departamentten.
Osy rette vedomstvo qandaı da bir qyzmet alý barysynda aqparattyq júıede sáıkessizdik anyqtalsa, onda málimetterdi túzetýge baǵyttalǵan aryz berý úshin Halyqqa qyzmet kórsetý ortalyqtaryna nemese tirkeýshi organǵa ne tıisti ádilet departamentterine júginýge jáne «elektrondy úkimet» portaly arqyly ótinish berýge bolatynyn atap ótti.
