Qazaqstandyqtar kúsh-jigerin jańa armannyń oryndalýyna jumsaýy kerek - A.Musaqojaeva

ASTANA. QazAqparat - Qazaq Ulttyq Óner ýnıversıtetiniń rektory, QR Halyq ártisi, Qazaqstannyń Eńbek Eri, professor Aıman Musaqojaeva QazAqparat tilshisine «Ult jospary - qazaqstandyq armanǵa bastaıtyn jol» atty Memleket basshysynyń baǵdarlamalyq maqalasyna qatysty pikirin aıtyp berdi.

«Qazir biz ómir súrip jatqan zaman - ózgerister zamany. Qoǵam, saıası jaǵdaı, sandyq tehnologııa, kommýnıkatsııalyq múmkindikter, tipti, órkenıettiń ózi kóz aldymyzda óte tez damyp, ózgerip jatyr. Tek adamnyń oılaý qabileti, súıý qabileti, armandaý qabileti ǵana ózgerissiz qalady. Eger de adamdy armandaý qabiletinen aıyratyn bolsaq, mádenıet, óner, ǵylym men jarqyn bolashaqqa degen talpynysyn aıyramyz. Mine, Memleket basshysy N.Nazarbaevtyń «Ult jospary - qazaqstandyq armanǵa bastaıtyn jol» atty baǵdarlamalyq maqalasy búkil qazaqstandyqtardyń armanyn mazmundap turǵandaı. Elimizdiń bul maqsaty - jalyndaǵan jastyqtyń armany emes, bul óte tájirıbeli saıasatker, memlekettiń basqarýshysy, dana, júrgen joly uzaq adamnyń armany, búkil eldiń armany», - deıdi óner ıesi Memleket basshysy N.Nazarbaevtyń maqalasyna oraı, oı bildire otyryp.

A.Musaqojaeva óz sózinde Prezıdenttiń bul maqalasyna qoldaý bildiretinin ataı kele, bul arman Qazaqstandy baı-qýatty elge aınaldyratynyn senim bildirdi. «Qazaq halqy bul armanǵa da jetedi. Búginde ata-babanyń azattyq týraly armany oryndaldy, qazaqstandyqtar endi kúsh-jigerin jańa armannyń oryndalýyna jumsaýy kerek»,-dep atap ótti A.Musaqojaeva.

«Qazaqstandyq armannyń máni - HHІ ǵasyrdaǵy kóshbasshy otyz ulttyń qataryna qosylý. Bul armanǵa biz tek naqty ári aýqymdy reformalar arqyly, Qazaqstandaǵy ekonomıkanyń naqty jetistikteri arqyly, ulttyń ál-aýqatyn kóterý arqyly jetemiz»,-dedi sózin qorytyndylaı otyryp A.Musaqojaeva.