Qazaqstandyqtar kún jyly kezde etti azyraq tutynady -statıstıka
ASTANA. QazAqparat - Qazaqstandyqtar maýsymnyń jyly mezgilderinde etti birshama azyraq jeıdi. Ekinshi toqsanda et ónimin tutyný deńgeıi birinshi toqsanmen salystyrǵanda qalalarda 2% , al aýyldyq jerlerde birden 8% tómendegen, dep habarlaıdy QazAqparat tilshisi Energyprom-ǵa silteme jasap.
Qazaqstan boıynsha ettiń bólshek saýdadaǵy baǵasy ósken.
Ettiń baǵasy bir aıda 1,7% qymbattap, bir kelige 1694,6 teńgege deıin jetken (bir jylda birden 9,3% kóterilgen).
Taýyq eti 1,1% deıin qymbattap, bir kelisi 745,7 teńgege jetken (ótken jylmen salystyrǵanda 0,9% arzandaǵan).
Sıyr, qoı men shoshqa eti bir aıda 0,2-0,3% qymbattaǵan (jyldan jylǵa 6,8% qosylǵan).
2018 jyldyń II toqsanyndaǵy úı sharýashylyqtarynyń et pen et ónimderin paıdalaný deńgeıi ústimizdegi jyldyń I toqsanymen salystyrǵanda 4,1% tómendep, jan basyna shaqqanda 18,7 kelige jetken.
Qalalyq jerlerdegi et ónimderin tutyný deńgeıi 1,7% túsip, 19,6% qurady. Degenmen et pen et ónimderin tutyný deńgeıi ásirese aýyldyq jerlerde 7,5% deıin túsip, jan basyna shaqqanda 17,4 kelige deıin tómendegen.
2018 jylǵy II toqsanda barlyq úı sharýashylyqtary arasynda eń kóp tutynylatyn ónimderdiń qataryna sıyr eti (jan basyna shaqqanda 5,9 keli), qoı (1,6 keli) jáne taýyq eti (1 keli) kirdi.
