Qazaqstandyqtar quldyqqa qalaı túsip qalady - ІІM jaýaby

ASTANA. QazAqparat – Qazaqstan polıtsııasy el azamattarynyń eńbek jáne jynystyq quldyqqa túsýiniń negizgi sebepterin jarııa etti, dep habarlaıdy QazAqparat tilshisi.

Іshki ister mınıstrliginiń Uıymdasqan qylmysqa qarsy kúres departamenti Adam saýdasyna qarsy kúres jáne qylmystyq protseske qatysýshylardy qorǵaý basqarmasynyń bastyǵy Samat Qusetovtiń sózine qaraǵanda, eńbek jáne jynystyq quldyqqa halyqtyń áleýmettik jaǵynan álsiz toby jıi túsip qalady.

«Adamdardyń quldyqqa túsýine tolyqqandy aqparattyń bolmaýy, quqyq saýatsyzdyǵy, arzan jumys kúshiniń qoljetimdiligi, sheteldikterdiń zańsyz mártebesi, ınternettiń yqpaly, tez ári jyldam aqsha tabýǵa umtylý syndy faktorlar jıi sebep bolady», - dedi ol Ortalyq kommýnıkatsııalar qyzmetinde ótken «Adam saýdasyna qarsy kúres: qurbandardyń quqyqtaryn qorǵaý» taqyrybyndaǵy dóńgelek ústel otyrysynda.

ІІM ókiliniń sózine qaraǵanda, kámeletke tolmaǵandar men áıelder jıi adam saýdasymen baılanysty qylmystardyń qurbany bolyp jatady.

Buǵan deıin otandastarymyz adam saýdasy jáne quldyqqa kóbine shetelge jumysqa barǵanda tap bolatyndyǵyn jazǵan edik.

Al jyl basynan elimizde adam saýdasy boıynsha 110 qylmys anyqtalǵan.